Nongpoh, Nailur 09: Shi bynta ban ïa snoh kti lang bad ka pyrthei baroh kawei ban rakhe ïa kata ka sngi kyrpang jong ka jingnang jingstad ba la tip kum ka ‘Word Literacy Day’ ka Umkra Lower Primary School ryngkat ka Seiborlang Upper Primary School, Umkra hynnin ka sngi ka la pynlong ïa ka jingrakhe ïa katei ka World Literacy Day hapoh katei ka skul kum ka jingangnud ban dang kyntiew ïa ka pule ka puthi.
Ïa kane ka jingrakhe la wan shim bynta da u Samla Evarist Myrsing, uba dei uwei na u samla rangbah ka Ri Bhoi kum u kongsan bad la sakhi lang ruh da ka jingdon lang u Rangbah Shnong, u Bah Lamphrang Laloo, ki Nonghikai, ki khynnah skul, ki kmie ki kpa bad kynthup ki riew rangbah katei ka shnong Umkra.
Kane ka jingrakhe ïa kane ka World Literacy Day da katei ka shnong kaba don sha kyndong ka Ri Bhoi ka la dei ha ka sien kaba ar bad ka thong ba kum ka Shnong bad ka skul ki rakhe ïa kane ka sngi jong ka jingnang jingstad ka dei ka jingangnud ban kyntiew ïa ka pule ka puthi khnang ban mih ki khun samla kiba la stad la nang na ka bynta ban wan rah ïa ka jingkylla hapoh katei ka shnong.
Ha kane ka sngi na ka liang ki bor pynïaid jong ka skul ki la sam ruh ïa ki khusnam sha ki khynnah skul kiba la jop ha ka jingïakop dro dur shi bynta ka jingrakhe ïa kane ka sngi kyrpang jong ka jingnang jingstad.
Haba kren ha kane ka sngi, na ka liang u Dr. Evarist Myrsing u la pynpaw ka jingkmen ba ka shnong Umkra ryngkat kitei ki skul ka Umrka Presbyterian LP School bad ka Seiborlang UP School ki la lah ban pynlong ïa kane ka jingrakhe ïa ka World Literacy Day bad kane ka dei shi bynta ban pynshlur ïa ki samla ba kin tip ban pyrkhat ba ha kane ka juk stad ba mynta khlem ka jingnang jingstad ngin nym lah ban poi sha kano kano ka thong jong ka jingim.
Kum u samla uba la biang pura ha ka kyrdan pule puthi, u Dr. Evarist Myrsing u la kren ruh shibun ki phang kiba dei shaphang ka jingnang jingstad ka juk stad ba mynta na ka bynta ban ai mynsiem ïa ki kmie ki kpa, ki khynnah skul bad ki nonghikai ba kin don lang kata ka jingkitkhlieh ban kyntiew ïa ka pule ka puthi.
Shuh shuh, u Dr. Evarist Myrsing u la kren ruh halor shibun ki bynta kiba dei shaphang ka jingnang jingstad kaba u la ioh lum jingtip kum uwei na u riew shemphang ha ka pule ka puthi bad kum u samla na dong Ri Bhoi u da ai mynsiem ruh ym tang ïa ka Shnong Umkra bad ïa ki shnong ka Ri Bhoi bad ka jylla ba ngi hap ban sngewthuh ba lada ngi ïaid kylleng ki ri ka pyrthei khlem ka jingnang jingstad ngin nym poi haei haei ruh, u la bynrap.
