Da ka Bike Rally pynlong ki shipai BSF, na Shillong sha Delhi ban rat diengkhong ïa u drok bad ki kam sniew
Nongpoh, Nailur 01: Shibynta ban rakhe ïaka jingdap 75 snem jong ka ri India, ki shipai ïada khappud Border Security Force (BSF) mynta ka sngi kila pynlong da ka rally thuk thuk ban pyrta halor ka jingma u drok bad ban rat diengkhong ïaki kam sniew kam smeh bad ki kam tuh kam thiem.
Ïa katei ka rally la sdang naduh Mawpat BSF Shillong bala plie da u Dr. Lajja Ram Bishnoi DGP ka jylla Meghalaya kum u kongsan haka jingdonlang u Inderjit Singh Rana IG BSF Meghalaya Frontier, bad kitei ki nongñiah thuk thuk kin leit ruh shaduh nongbah Delhi haka jing jngai kumba 2729 km bala thmu ban pyndep hapoh 16 sngi.
Ïakitei ki nongñiah thuk thuk la pdiang ruh ha Nongpoh Indoor Stadium mynta ka sngi da ki bor district haka jingdonlang u SP ka Ri-Bhoi u Giri Prasad, u Bah MB Tongper Additional Deputy Commissioner, hakaba u GS Dhaliwal u la long kum u kongsan haka jingdonlang u Sanjay Sharma Commandant ka 172 Battalion BSF Shillong, bad kiwei kiwei.
Naka liang ki shipai ha katei ka sngi kila pyni nam ruh ïaki tiar ïaleh, ki jingleh yoga, ki phlim lyngkot jong ki shipai BSF ban pyni kumno ka jingtreikam jong ki BSF bad ruh haka jingïaleh ban rat dieng bad tem ïaki kam tuh kam thiem bad khamtam ka jingkynrei jong u drok kaba la ktah shibun ïaka imlang ka sahlang bad ki khun samla.
Haba kren ha katei ka sngi kum u kongsan naka liang u GS Dhaliwal u la pynpaw ba ka thong jong katei ka rally ka long ban pynphriang ïaka khubor halor ka jingkynrei bad ka jingma jong u drok, ki kam sniew kam smeh naka bynta ban wanrah ka jingkylla haki khun samla khamtam ban pynrung ïaka mynsiem ieid ri khlem da kheiñ ne ñiew shilliang ïano ïano.
U la ong ruh ba kum ki shipai BSF kila leh shibun ki kam ban tehlakam bad ban tem ïaki kam sniew kam smeh ha kaba kila ioh ban kem bad kurup naka por shaka por ïai drok, ki jingkhaii tuh bad beaiñ bad kiwei kiwei da kaba ai mynsiem ruh ïaki khun samla ba kin rung shaka kam shipai BSF naka bynta ban long ki nongïada ïaka ri.
Ha katei ka sngi naka liang kitei ki nongñiah thuk thuk kila pyni nam ruh ïaka sap ñiah thuk thuk ha surok bah National Highway ha Nongpoh.