Nongpoh, Nailur 01: Ki nongïalam ka Federation of Khasi Jaiñtia and Garo People (FKJGP) North Khasi Hills District haka sngi Balang kila hiar sha ka thaiñ Byrnihat naka bynta ban pynskhem ïaki nongkitkam ba thymmai jong ka Shakhoikuna Circle jong u snem 2022-25 hadien bala kut ka samoi treikam jong ki nongkitkam barim ban pynkhlaiñ ïaka jingtreikam jong ka seng khamtam haki jaka khappud jong ka jylla.
Ha katei ka jingpynskhem ïaki nongkitkam ba thymmai ka Byrnihat Circle la wan ban don lang da u Bah Lui Lyngdoh President, North Khasi Hill District, Lumlang Mawnai Senior Vice President, Shanlang Diengdoh General Secretary, North Khasi Hill District, Gabriel Sunn Education Secretary North Khasi Hill District bad ïa ka jingïalang ha katei ka sngi la pyniaid da u samla Noah Khongstid Assistant Secretary haka jingdonlang u Bah Henry Nongrum Rangbah Shnong.
Ki nongkitkam ba thymmai jong ka FKJGP Shakhoikuna Circle naka bynta ka samoi treikam jong u snem 2022-25 ki kynthup ïa u Khil Maring, kum u president, u Gilbert Maring, vice president, Moris Nongshli, General Secretary, u Khraw Sylliang, Organizing Secretary lem bad kiwei kiwei ki nongkitkam.
Haba kren ha katei ka sngi naka liang u Bah Lui Lyngdoh President hadien ka jingpynskhem u la pynpaw ka jingsngewkmen ba ka mynsiem ieid ri haki khun samla ka dang rhem katba dangmih ki sngi, bad kum ka seng ka dang don ka jingangnud ban dang pyniar bad pynkhlaiñ ïaka jingtreikam sha man la ki jaka khamtam ki khappud ba ki dkhot kin long kiba peitngor.
U la kyntu ruh ïa kitei ki nongkitkam ba thymmai ha katei ka sngi ba kin long ki shipai kiba don ka jingkitkhlieh naka bynta ka jaitbynriew, ban long ki nuksa sha ka imlang ka sahlang bad khamtam ban ai ka jingshakhri kaba bha tam sha katei ka thaiñ.
