Ngam salia wat ban sahmiet marwei ha Secretariat lada ka sorkar ka bakla ha jingpynbeit pud : B Sohtun

Nongpoh, Nailar 28: U Bah Blikstar Sohtun President ka Synjuk ki Rangbah Shnong Raid Nongtung u la ong ba ka sorkar ka dei ban leh janai haka jingpynbeit pud haka wat kaba ar haka thaiñ Block II jong ka Raid Nongtung ha Ri-Bhoi, kumba ki paidbah bad ki nongïalam shnong ki kwah ba baroh ki shnong khasi kidei ban hap sha ka jylla Meghalaya.
“Ngam salia wat ban shong sahmiet ha Secretariat lada ka sorkar kam sngap ïaka sur jong ki paidbah ka Raid Nongtung ha kane ka jingpynbeit pud jong ka wat kaba ar, ban kynthup lut ïa baroh ki shnong Khasi sha ka jylla Meghalaya, kumba u Myntri Rangbah ka jylla Assam bad Meghalaya ki dep ban ïakren dang shen ban sdang noh ïaka jingpynbeit pud haki 6 tylli ki jaka kajia pud ba kynthup ïaka Block II” la ong u Bah B Sohtun.
U la kyrpad ruh sha ka sorkar ba kane ka jingpynbeit pud haka wat kaba ar, wat la ka dei kaba kham jwat hynrei ka dei ban long kaba janai ban nym mih kano kano ka jingthud bad ka jingshah kynthoh, namar ki paid khasi ba shong ba sah haka thaiñ Block II kim kwah ban leit sha Assam, hynrei ki angnud bad thrang ba ki shnong kin hap sha Meghalaya.
Halor ka kam pynbeit pud, naka liang ka synjuk ki Rangbah Shnong kala ai ka jingïaroh ïaka sorkar jylla kaba la shimkhia ban pynbeit ïa u pud u sam hapdeng ka jylla Meghalaya bad Assam haka wat kaba ar bad khmih lynti ba katei ka jingpynbeit pud kan long kaba seisoh bad kaba pynhun ïaki paidbah ha katei ka thaiñ da kaba ban jur ruh sha ka sorkar jylla ba ki shnong khasi kim dei ban duh kumba la ïakren hynrei ba kidei ban shah kynthup haka jylla Meghalaya katkum ki kot ki sla bad ki riti dustur naduh mynbarim, ryngkat ka jingkyrpad ruh ïaki kynhun sengbhalang bapher bapher ba kin ai ka jingïatreilang ha katei ka jingpynbeit pud.