Sakhi da ki phew spah ngut ha ka jingïalehkai phutbol ki Ophisar Sorkar pyrshah ïa ki Pastor ka Mawkyrwat Zone

Mawkyrwat, ‘Nailar, 24: Ki nongtrei sorkar jong ka South West Khasi Hills District mynta ka sngi ki la long ki lahduh da kaba ki la jop da 3 – 1 kol pyrshah ïa ki Pastor jong ka Mawkyrwat Zone ba kynthup ïa ki saw tylli ki Presbytery ha ka lympung ïalehkai kynjatbol ba la tip kum ka ‘Charity Football Friendly Match’ kaba la pynïaid da ka Jingïaseng Ïasyllok ki Pastor jong ka Khasi Jaiñtia Presbyterian Synod Sepngi kaba la long ha madan Saitsnad, Mawlangwir, South West Khasi Hills District.
Ka jingthmu jong kane ka jingïalehkai ka long ban pynmih pisa ban ïoh ban shna ïa ka Centenary Building, Hospital Annexxe jong ka Dr. H. Gordon Robert Hospital, Shillong kaba long ruh kum ka dak jong ka jingrakhe ïa ka jingdap 100 snem jong ka jingïaid lynti ha kaba ïa dei bad ka jingai ki lad jingshakri lyngba ka koit ka khiah jong ki briew bad kaba dei halor ka phang, “Haduh kane, U Trai U la ïarap ïa ngi”.
Haba phai ha ka jingïalehkai kaba dei hapdeng ki Pastor jong ka Mawkyrwat Zone bad ki Nongtrei Sorkar jong ka South West Khasi Hills District ka la long da shisha ka jingïalehkai kaba i shongshit bha namar da ki hajar ngut ki paidbah na kylleng ki jaka ki la wan ban sakhi bad ban ai mynsiem ïa ki. Kane ka jingwan jong ki paidbah ruh ka long kawei na ki bynta ban ai ka jingkyrshan na ka bynta kane ka jingthmu jong ka Khasi Jaiñtia Presbyterian Synod Sepngi ban nang pynïar shuh shuh ïa ka ki lad ai jingshakri na ka bynta ki paidbah kiba donkam ka jingïarap ha ka liang ka jingkoit jingkhiah.
Ha ka jingïalehkai jong ka kyllastep, na ka liang ki Nongtrei Sorkar jong ka South West Khasi Hills District ki la ïoh ban thep ïa ki ar tylli ki kol kata ha ka minit kaba 13 bad 30 lyngba u Hiwot Rymbai katba ki Pastor pat ki la ïoh ban pynphai ha ka minit kaba 31 na u Pastor Peacefullman Paliar Katba ha ka jingïalehkai jong ka kyllamiet pat ki ki Nongtrei Sorkar jong ka South West Khasi Hills District ki la ïoh biang sa kawei pat ka kol ha kaba u Steveford Marweiñ u la ïoh ban thep ha ka minit kaba 65. Kumta ka jingïalehkai ha kane ka sngi la jop da ki Nongtrei Sorkar jong ka South West Khasi Hills District pyrshah ïa ki Pastor jong ka Mawkyrwat Zone da 3 – 1 kol.
Ha ka jingïalang ba lyngkot, u kongsan u bah Pius Marweiñ, MLA/MDC jong ka Ranikor Constituency ha ka jingkren jong u u la ai mynsiem na ka bynta ka Jingïaseng Ïasyllok ki Pastor jong ka Khasi Jaiñtia Presbyterian Synod Sepngi kaba la pynlong ïa kum kane ka lympung jingïalehkai kynjatbol ba ki don ha ka ïa ka jingthmu kaba bha ban kner ïa kti jong ki ban ai ka jingshakri ïa ki para briew lyngba ki lad jingsumar. Namarkata, u la ong ba lyngba kane ka sngi kan long ruh ka sngi jong ka jingsah jingkynmaw ïa u bad kymjuh ruh ïa nongtrei sorkar, u MLA, u MDC bad kumjuh ruh ïa ki Pastor namar ka jingïoh ban ïa kynduh kumne kan long kawei ka lad ban pynïajan ha ki rukom treikam bapher bapher.
“Da ka mynsiem jong ka jingsngewieit bad ban ïadon bynta lang ha kane ka jingthmu ba bha jong ka Khasi Jaiñtia Presbyterian Synod Sepngi, ngan noh synñiang na ka pla la jong kumba T. 1/- lak tyngka”, ong u bah Pius. Shuh shuh haba bynrap ïa ka jingkren, u bah Pius Marweiñ u la ai mynsiem bad khublei kyrpang ïa baroh ki Pastor, ki Tymmen Basan, ki ‘riew rangbah jong ka Khasi Jaiñtia Presbyterian Synod Sepngi ba kin nang ïa pyntyllun ïa ki kam shakhmat da ka jingdon ryngkat ka jong U Blei Trai Kynrad na jrong.
Ïa ka jingïalang ba lyngkot ha kane ka sngi la pynïaid da u Rev. H.W. Nongbsaw, ka jingduwai na u Rev. Dr. S.I. Iawphniaw, ka jingkren pdiang na u Rev. S.N. Wahlang, bud da ka jingkren lyngkot na ka Central Organisationg Committee bad na ka Dr. H. Gordon Robert Hospital. Ha kane ka sngi la ïoh ruh ki jingrwai kyrpang na ka Standing Choir jong ka Jingïaseng Samla Nongsynrieh Presbytery bad na ka Jingïaseng Samla Balang Presbyterian Rangthong.
Ïa ka jingkren la ïoh na u T.Bn. S.C. Syiemlieh bad ka jingduwai pynkut na u Rev. H.W. Nongsiej.