Shillong, Nailar, 16: Ka sorkar jylla ka la rai ban mang tyngka haduh 250 klur tyngka na ka bynta ban ïoh maramot noh ïa baroh ki jingjulor kynthup naduh ki surok, ki jingkieng, ki jingthung jingtep bad kiwei kiwei kiba la shah pynjulor ha ka jingshlei um bad ka jingtwa khyndew kaba la wan lyngshop ha u Jylliew mynta u snem.
Ïa kane la pyntip da u Myntri Rangbah ka jylla, Conrad K Sangma haba kren kum u Kongsan ha ka jingrakhe ïa ka lyngkhuh dap 76 snem ka jingïoh laitluid jong ka Ri kaba long ha kane ka 15tarik mynta u bnai. “Ngin pynlut kumba 250 klur tyngka na ka bynta ban maramot ïa baroh ki jingshah pynjulor bad kumta nga kyrmen ba ngin lah ban maramot noh ïa kitei baroh ha kine ki 6 bnai haduh 12 bnai,” u la ong.
U Myntri Rangbah u la ongruh ba ka jingther u lapbah ha u Jylliew mynta u snem ka la wanrah ïa ka jingshlei um bad ka jingtwa khyndew kaba khlem poi pyrkhat ha kylleng ki bynta jong ka South Garo Hills, South West Khasi Hills, East Khasi Hills bad ruh ha East Jaintia Hills District.
“Dalade hi nga la leit ban jurip ïa kitei ki jaka ban ïohi bad antad ïa ki jingjulor bad nga dap ruh da ka jingsngewsih kaba khraw halor ka jingduh ei ïa ka jingim briew. Ka sorkar mardor hi ka la shimkhia ban leh ïa kaba donkam ban ïoh maramot noh khamtam ki jingjulor kiba ïadei bad ki jingthung jingtep, ki jingdon jingem, ki surok, ki jingkieng, ka umbam umdih bad wat ka bording ruh,” bynrap shuh shuh u Myntri Rangbah da kaba ai jingïaroh ruh ïa ki bor pahara kum ka Air Force, BSF bad kiwei kiwei kiba la trei borbah ha kitei ki por.
Haba ïadei pat bad ka jingïakhun jong ka jylla ban pynneh pynsah ïa ka mariang, u Myntri Rangbah u la ïathuh ba ha u 2019 ki la pyntreikam ïa ka ‘One citizen one tree’ lane uwei u nongshong uwei u dieng ki hap ban thung. U la ïathuh ruh ba haduh mynta ka jylla ka la ïoh ban thung haduh 25lak tylli ki tynrai dieng ha ki 450 tylli ki shnong ha kine ki ar snem.
