Ha ka rakhe I-Day sam u Myntri Rangbah ïa ka khusnam sha ki shnong ba itynnad tam

Shillong, Nailar 16 : Kum shi bynta ka jingrakhe ïa ka lyngkhuh snem ba 75snem ka jingïoh laitluid jong ka Ri, Myntri Rangbah ka Jylla, Conrad K Sangma ha ka 15tarik mynta u bnai u la sam bun tylli ki khusnam la ka long naduh ki shnong ba lehkhuid bad itynnad, nangta ka khusnam sha ki pulit, Home Guard kumjuh sha ki jaka sumar kiba tbit tam, ha ka jingïalang kaba long ha Madan Polo.
Ïa ka khusnam kum ka shnong kaba itynnad tam la ïoh da ka Dorbar Shnong Nongrim Hills katba ïa ka kyrdan kaba ar la ïoh da ka Mawlai Iewrynghep bud pat sa ka Jail Road Welfare Committee ïa ka kyrdan kaba lai.
Ïa ka khusnam kum ka shnong kaba ki paidbah baroh ki jied lane ka ‘People’s Choice Best Locality Award’ katkum ka jingïoh vote, la ïoh da ka Dorbar Shnong Nongmensong, ïa ka khusnam Best Street Art (Shnong) la ïoh da ka Dorbar Shnong Wahingdoh bad ïa ka khusnam Best Street Art (nongdro) la ïoh da ka Dorbar Shnong Laban.
La pynbna ruh ïa ka kyrteng ki nongïoh ïa ka Police Medal na ka bynta ki kam riewshlur la ïoh da u Bah Lakador Syiem, Commandant, 6th Battalion Meghalaya Police, Umran Ri-Bhoi District; Bikram D Marak, Superintendent of Police, West Jaintia Hills; T C Chacko, Deputy Commandant, 4th MLP Battalion, Vikaspuri, Police Line, New Delhi bad u Galdinson R Marak, AB Inspector, Kote, Meghalaya. Katba ïa ka Union Home Minister’s Medal for Excellence in Investigation, 2022 la ïoh da u Deputy SP, u Bah Pyrkhatlang Suchiang.
La pynbna ruh ba ïa ka khusnam ba tip kum ka Home Guards & Civil Defence Medals la ïoh da u Kharnesh A. Sangma, Sub-Inspector (HG) bad u Bah T. Marbaniang, Havildar (HG).
Ha kane ka sngi, u Myntri Rangbah u la sam ruh ïa ka khusnam sha ki nongjop ha ka March Past kiba la shim bynta ha katei ka jingrakhe ïa ka lyngkhuh snem ka jingïoh jinglaitluid ka Ri. Ïa ka khusnam ba nyngkong la ïoh da ka St. Mary’s Higher Secondary School, katba ïa ka khusnam ba ar la ïoh da ka Nongrah Presbyterian Secondary School katba ka Seven Set Higher Secondary School ïa ka kyrdan kaba lai.
Kiwei kiwei ki prokram ha kane ka sngi ki kynthup naduh ka jingsam ïa ka Kayakalp Awards sha ka Tura Civil Hospital kaba la ïoh ïa ka khusnam kum ka Best District Hospital, nangta ïa ka khusnam Best Community Health Centre la ïoh da ka Sohiong CHC, Best Primary Health Centre la ïoh da ka Jongkha PHC bad ïa ka khusnam Health and Wellness Centre la ïoh da ka Thynroit Sub Centre.
Kiwei ki khusnam ba sam ha katei ka sngi ki kynthup sha ka Reid Provincial Chest Hospital, Pomlum PHC, Kharang Sub Centre bad ka Lyngkhoi Sub Centre kiba ïoh ïa ka nam Best Hospital, Best PHC bad Best Health and Wellness Centre.
Ha katei ka jingrakhe, u Myntri Rangbah u la pyllait paidbah ruh ïa ka thup sah kynmaw kyrpang halor ka jingrakhe sngi laitluid kaba 75 jong ka India ha ryngkat ka jingdonlang u Chief Post Master General, NE Circle, u Subrat Das.
Shwa kane, u Myntri Rangbah hadien ba u la pynher ïa ka lama lai rong u la shim ruh ïa ka Rashtriya Salute jong ki 22 tylli ki kynhun ba shim bynta ha ka March Past kynthup naduh ka Assam Rifles, BSF, CRPF, East Khasi Hills DEF, 1st MLP Bn, SF10, NCC, Bharat Scouts and Guides, St. Edmund’s Higher Secondary School, St.Mary’s Higher Secondary School, St Anthony’s Higher Secondary School, Nongrah Presbyterian Secondary School, Holy Cross Higher Secondary School, Mawngap District Christian Multipurpose Higher Secondary School, Unitarian Higher Secondary School, St Joseph’s Girls Higher Secondary School, Shullai Progressive Secondary School, Seven Set Higher Secondary School, Meghalaya Police Public School, kynhun shong kulai jong ka Assam Rifles Public School bad ruh na ka brass band jong ka Border Wing Home Guards.