Dei ban tuklar ka sorkar ïa ka jingpan khajna ka Cantonment Board na ka Lady Keane College : KSU

Shillong, Nailar 14: Hadien ba ka Contontment Board (CB) ka la pynmih ïa ka hukum ba ka Lady Kean College, Shillong ka dei ban siew ïa ka khajna “Property Tax” kaba kot haduh kumba 45 lak tyngka tang na bynta u snem 2022-23, ka Khasi Students’ Union (KSU) ka la pynpaw ïa ka jingpyrshah kaba jur halor kane ka jingleh ka CB bad ka dawa ruh ba ka sorkar jylla ka dei abn tuklar mardor ïa kane.
Ka KSU ka la kdew ba ïa kane ka jaka pule la seng naduh u snem 1935 mynba ka sorkar phareng ka dang synshar ïa kine ki lum jong ngi ba kumno pat ka CB kaba la pynkha kham hadien ka kam trai pynban ïa kane ka jaka ba don ka Lady Kean College.
“Kumno ka Cantonment Board ka lah ban kam trai ïa ka jaka ba don ka Lady Keane College haba ïa kane ka kolej la seng naduh u snem 1935 bun bun snem shwa ban kha ïa ka Cantonment Board. Ka long kaei kaei ka bym sngew shong nongrim ban shu dawa ïa khajna kynsan kynsan khamtam haba ïa katei ka kolej la seng naduh ki por ba synshar ka Ri Bilat’ ong ka KSU lyngba ka kyrwoh ba la phah da u General Secretary u Samla Donald V Thabah.
Shuh shuh a KSU ka kdew ba ha ka jingshisha ka sorkar ka dei ban ai ka jngithuh kyrpang ïa ki jaka ai jinghikai ïa ki samla khnang ban lait ka jingïatyngkhuh bad bad ki aiñ ka sorkar pdeng bad sorkar jylla.
“Satlak ka pyrthei ngi ïohi ba baroh baroh ki trei borbah ban kyntiew ïa ka pule puthi hapdeng ki kynthei, ka Lady Keane College ruh ka dei kawei ka shlem hikai ïa ka pule puthi kaba la seng kyrpang tang na ka bynta ki kynthei. Kane ka kolej ka la ai jingmyntoi ruh shibun eh ban rat dyngkhong ïa ka jingsahdien ki khun kynthei ka Jaidbynriew Khasi ong shuh shuh ka kyrwoh na ka KSU.
Ka KSU ka ka ong ba ha ka jingshisha ka kolej ka dei ban ïoh ka jingithuh kyrpang ïa u synïang uba ka la noh sha ka jingnang jingstad ka bainong kaba ka ïoh ka long pynban ka jingshah teh shah khum bad ka jingshah dawa kajna.
“Kaei ba ka Cantonment Board kan leh lada kane ka kolej kam lah ban siew ïa katei ka khajna? Kaei ka ban jia ïa ki samla pule katei ka kolej? Mano ban bah khlieh ïa ka lawei jong kitei ki samla? Hato ka Cantonment Board kan lah ban bah khlieh”, buh jingkylli ka KSU.
“Ka KSU ka pynpaw ïa ka jingpyrshah kaba jur ïa kane ka jingleh donbor ïa ki shlem ai jingnang jingstad kiba noh shikatdei ïa u synnïang u bynhei ha ka ban kyntiew ïa ka pule puthi. Ka sorkar ka dei ban tuklar noh mardor ïa kane ka mat bad ka KSU ka pynsngew ba ka ai ka jingkyrshan kaba pura ïa ki bor pynïaid ka Lady Keane College” ong ka kyrwoh.