Shillong, Nailar, 14: Ka tnat Arts and Culture jong ka Sorkar Meghalaya ha ryngkat ka jingïatreilang bad ka Indian Council For Cultural Relations (ICCR) ha ka sngi Saitjaiñ ka la pynlong ïa ka “State Launch of Har Ghar Tiranga” ha ka jingïalang kaba la long ha U Soso Tham Auditorium, Shillong.
U Myntri ka tnat Kam Pohing u Bah Lahkmen Rymbui uba la long kum u Kongsan ha kane ka jingïalang u la pynher ïa ka lama lai rong jong ka ri India kum ka dak ba la ailad ïa ki paidbah nongshong shnong jong ka Jylla ba kin wah ïa ka lama lai rong jong ka ri India ha la ki ing ki sem haduh ka sngi rakhe laitluid jong ka ri India ka ban sa long ha ka 15 tarik mynta u bnai/.
Haba kren kum u Kongsan u Bah Lahkmen Rymbui u la ong ba kane kan long ka sngi bakyrpang ïa ngi kum ki nongshong shnong ka ri India namarba ngi burom ïa ka jinglong kyrpang jong ka lama jong ka ri.
“Kumba ngi la rakhe ïa ka jingïaid lynti sha ka jingdap 75 snem ka jingïoh laitluid bad ka jingdap 50 snem jong ka jingïoh ïa la ka jong ka jylla, ngi lah ban ïohi ïa ka jingthrang, ka jingieid jong ki nongshong shnong ka jylla ïa ka lama lai rong jong ka ri ha kane ka por.
U la ong ruh ha ka jingïaid lynti sha ki bynta bapher bapher jong ka jylla, la sakhi ïa ka jingpynher ïa ka lama lai rong jong ka ri ha la ki ing ki sem, ha ki kali. U la pynpaw ka jingsngewnguh ïa ki Self Help Group kiba la trei shitom ban suh ïa kine ki lama na ka bynta ka jingpyndonkam ha kine ki lai sngi kynthih.
U Myntri u la ai khublei ïa u Myntri Rangbahduh ka ri u Narendra Modi uba la pynkynmaw ïa ki nongshong shnong jong ka ri nalor kaba wah ïa ka lai lai rong jong ka ri ha ki ing ki sem, ki dei ruh ban don ka jingieid ha la ka jong ka dohnud.
U la ïathuh ba ha kine ki snem ba la leit noh, ïa ka lama jong ka ri la pyndonkam tang ha ki sngi ba kyrpang hynrei mynta ngi sngewthuh ba kum ki nong India ngi dei ban pynneh pynsah bad ban ñiew kor ïa ka spahbah jong ka ri, ïa ki shab jong ka ri. Kane kan long shi bynta na ka kamram jong ngi ban burom ïa ka ri kaba la ai ïa ngi bun kiei kiei, watla ngi ïapher ha ka thaiñ, ngi ïoh ïa ka jinglaitluid kum ki nong India ka ri lajong.
U la pynkynmaw ruh ba ngi dei ban burom ïa ka lama jong ka ri namarba ka don la ka jong ka jingmut bad kaba pynshlur ïa kiba dang khie dang san.
Shuh shuh u la bynrap ba kum ki nongshong shnong ngi dei ban sngew sarong ïa la ka ri bad ban pynher ïa ka lama lai rong da ka jingsngew sarong.
U Chief Secretary ka Jylla u Bah DP Wahlang uba la long kum u Symbud Kongsan u la ai jingkren ruh ha kane ka jingïalang.
Ka jingwah ïa ka lama lai rong jong ka ri ha la ki ing ki sem kan neh haduh lai sngi kata naduh ka 13 tarik haduh ka 15 tarik u Nailar khnang ban ïoh shisha ïa ka jinglait luid kaba 75 snem ka ri India.
U la batai bniah shaphang ka jingmut jong ka lama lai rong jong ka ri bad ïa ki jingmut jong ka shalyntem Ashoka Chakra.
Ha kane ka sngi la ïashim bynta da ki samla pule na ki skul bapher bapher, ka kynhun ki barikor na kylleng ka jylla bad kiwei kiwe.
Kiwei kiwei kiba la ai jingkren ki kynthup ïa u Bah F R Kharkongor Commissioner Arts & Culture, u Bah Cyril V D Diengdoh Secretary ka tnat Kam Pohing bad kiwei, ka Kong Isawanda Laloo Deputy Commissioner jong ka East Khasi Hills, u bah K L Nongbri uba long u State Nodal Officer jong ka Har Ghar Tiranga bad kiwei kiwei.
