Ka Congress kan long ba nyngkong ha ka jingieid na u paidbah ka NPP, UDP pat ha ka jingthok jingshukor: Vincent Pala

Shillong, Nailar 11: U President ka MPCC u Bah Vincent H Pala ha ka sngi Palei u la kam ba ym baroh ki MLA kiba ryngkang dieng kper na ka seng Congress kin ïai bteng ban jop ilekshon kumba long u Symbud Myntri Rangbah ka jylla u Bah Prestone Tynsong uba ïai jop wat hadien ba u ryngkang na ka seng Congress sha kawei pat. U Bah Vincent u la ong ba kumba long mynta ki paidbah ki ieid bad shaniah tam ïa ka seng Congress bad u la kam ruh ba ka Congress kan long ba nyngkong ha kane ka liang katba ka NPP bad ka UDP pat kin wan ba nyngkong ha ka jingthok bad jingïalam bakla ha ka ilekshon MLA ha u snem 2023.
U Bah Vincent u la kyntait ruh ïa ka jingkam u nongïalam ka NPP u Bah Prestone Tynsong ba ka history jong u snem 1972 kan urlong biang ha ka saiñhima ha kaba ka Congress kan jop tang khyndiat tylli eh ki seat.
“ U Prestone u dei hi Prestone, ym baroh kin long kum ma u. Kum ka nuksa mynba u Bah Prestone u dang don ha ka seng Congress u la jop da bun bun hajar vote ïa uba ïakhun pyrshah bad peit hi katno vote u tam ynda u ïakhun noh na kawei pat ka seng” ong u Bah Vincent.
U Bah Vincent u la ong ba ka jingkren u Bah Prestone ka dei ba u kren beit tang ïa lade bad u la ong ruh ba ym baroh ki MLA kiba la phet na ka seng kin dang jop biang ha ka ilekshon ha u snem 2023.
Shuh shuh u Bah Pala u la ong ba ki paidbah nongthep Vote jong u snem 1972 bad ki nongthep Vote jong u snem 2023 ki ïapher bak-ly-bak bad u al bynrap, ‘ka ilekshon ha u snem 2023 ka dei ka ilekshon kaba ki paidbha nongjied kin pynshong nongrim ha ka jingnang jingstad bad ka technoloji. Lada ngin pynshong nongrim ha ka jingdon spah ban khroh vote bad jingthok bad jingïalam bakla ki banka NPP bad ka UDP kin long ba nyngkong hynrei lada ha ka nongrim jong ka jingïoh jingshaniah bad ka jingieid na u paidbah ka Congress hi kaban wan shakhmat eh”
“Phi hap ban peit bha ba kin don kiban thep Vote da kaba pynshgong nongrim ha ka jingieid bad ka jingshaniah bad kin don ruh kiba thep ha ka jingïoh pisa dei ha u 2023 keiñ kan phin sa ïohi mano ba kham tam” ong u Bah Vincent
U la ong ruh ba ka Congress kan sa pynïakhun ha u 2023 da ki briew kiba dang eh dang khlaiñ bad kiba la biang ka jingnang jingstad bad kiba khuid ba suba na ka bam sap bad ki kam shukor.
“Hooid, ngam len ïa kaba u (Presrone) la kam ba kiba bun hi kiban ïakhun ki dei kiba dang thymmai bad kaei kaba jia ha u snem 1972 kan pher bak-ly-bak bad kaei kabn jia ha u 2023 bad nga sngewskhem ba kum ka party ngin leh bha ha ka ilekshon” u la bynrap.
U Bah Vincent u la kam ruh ba u Symbud Myntri rangbah u don ka jingïasngewthuh jingmut bad ka jingïadei kaba khlaiñ bad ka BJP.
“Ka BJP kan ai ruh ka jingkyrshan kaba khlaiñ ïa ka NPP ha baroh ki liang ba kynthup ha ka jinglut jingsep, ka jingpynbieit ïa u paidbah bad kat kiba ka NPP hi ka donkam ka BJP kan theh lut” ong shuh shuh u Bah Vincent.
Shuh shuh na ka liang jong u, u la kyntait ba kan don kano kano ka jingïatehlok shuwa ka ilekshon bad ki party ba don ka jingïajan nongrim bad ka Congress da kaba ong ba ka Congress kan ïakhun hi beit marwei..
“Ngin ym don kano kano ka jingïatehlok bad kiwei ki seng hynrei kum ka party ngin pynïeng kyrtong ha baroh 60 tylli ki constituency” u la ong.