Shillong, Nailar 06: Ka District Tuberculosis Officer(DTO) ka Dr Kharwanlang ha ka sngi Thohdieng ka la ïathuh ba ka jingdon kiba ïoh ïa ka jingpang TB ha ka East Khasi kan khamtam mynta u snem ban ïa nujor bad u snem ba la dep.
Haba kren bad u Mawphor ka Dr Kharwanlang ka la ïathuh ba ha u snem ba la dep kiba ïoh ïa ka jingpang TB ki poi tang kumba 1979 ngut ha ka district hytnrei mynta u snem dang ha u bnai Naitung ruh kiba ïoh ïa kane ka jingpang ki la poi kumba 1000 tam.
Ka Dr Kharwanlang ka la ïathuh ba kane ka jingkiew kiba iuoh ïa ka jingpang TB ka long ruh ka jingbuh ryntih ban ïoh jingkheiñ wat na ki jaka ai jingsumar shimert ha ka jylla lyngba ki mobile Applicatin bad ka jingpynjur ka tnad ka koit ka khiah hi ha ka jylla ban pynjur ka jingtest ha ka jylla. Shuh shuh ka la ïathuh ba ka tnad ka koit ka khiah ka jylla ryngkat ka sorkar India hi baroh kawei kin trei tyngeh ban lah ban rat dyngkhong syndon ïa ka jingpang TB ha ka ri baroh kawei ha u snem 2025.
Shuh shuh ban pynphriang ïa ka jingtip ïa ki lad jingsumar ïa kiba pang ba shitom TB ka ophis ka DTO ha ka sngi Thohdieng ka la pynlong ïa ka prokram jinghikai ryngkat ka jingïatreilang bad ki artylli ki kolej ka St Edmund bad ka Women College na bynta ki samla pule ha ka laiñ Social Work. Ha kane ka sngi ka DTO ka Dr Kharwanlang ka la ai jinghikai ïa ki samla pule ba kumno kin long ki nongrah khubor shaphang ki lad jingsumar jong ka jingpang TB.
