Sha u President UDP pynpoi ïa ka shithi iehnoh kam ki nongïalam UDP Mawlai

Shillong, Nailar 07 : U MLA barim ka Mawlai Bah Embhah Syiemlieh ryngkat ki nongkitkam ba ha khmat jong ka UDP Mawlai constituency ki la pynpoi sha u President Rangbah ka UDP ïa ka shithi ba ki la iehnoh ïa ka kam kum ki nongïalam jong ka Mawlai, kumjuh jong ka Shillong City bad State Youth Wing.
Ka daw kaba pynlong ïa kitei ki nongïalam ba hakhmat ka UDP ban shim ïa katei ka rai kdaei hadien ba ki nongkyrshan bad ki nongkitkam jong ka UDP Mawlai ha ka jingïalang kaba long ha ka 29 tarik da kawei ka sur ki la rai ban mih noh na katei ka party.
Ha katei ka shithi ba ki pynpoi sha u President, ki nongïalam kiba la iehnoh na ka party ki kynthup naduh u Bah Embhah Syiemlieh nongaibuit ka UDP State Youth Wing, Vice President UDP Shillong City district bad nongaibuit ka UDP Mawlai circle, Bah Manbhalang Marius Syiemlieh uba dei u Joint Secretary ka UDP State Youth Wing, President ka UDP Youth Wing Shillong City District.
U Bah Raymon Khyriem uba dei u Joint Secretary ka UDP Youth Wing Shillong City District bad Working President ka UDP Mawlai Circle, u Bah Pyndap Lawriniang uba dei u Publicity secretary ka UDP Youth Wing Shillong City, Bah Seiborlang Kharbamon uba dei u Assistant.Secretary ka UDP Youth Wing Shillong City, Bah Bankerlang Marbaniang uba dei u Finance secretary ka UDP Youth Wing Shillong city bad Bah Dimos June Syiemlieh uba dei u Vice-President ka UDP Mawlai Circle.
Kane ka jingphah shithi iehnoh sha u Bah Metbah ka long hadien ba ka UDP kam shym la burom shuh ïa u Bah Embhah Syiemlieh uba dei u MLA barim ka Mawlai hadien ba u Bah PT Sawkmie u la pynkhreh ban ïakhun noh na ka seng UDP ha u snem 2023.
U Bah Embhah u la ïathuh ba ka daw kaba pynsngewsih eh ïa ki nongïalam kadei namarba dei u Bah Embhah uba tyrwa hi ïa u Bah PT Sawkmie ban ïakhun noh na ka seng UDP, hynrei katba nang ïaid ka por ki nongkitkam ba thymmai ki la sdang ban leh kiar ïa u namar kim kwah ba ka tiket MDC kan poi sha utei u MLA barim.
Ha katei ka jingïalang kaba long ha ka 29tarik ym tang ki nongïalam ba hakhmat kiba mih na ka UDP Mawlai hynrei wat ki nongkitkam na ki longkmie ne ki Mahila ryngkat ki nongïalam bad nongkyrshan na ki unit kiba la lang ïa katei ka rai ban bud lang beit ïa u Bah Embhah.