Khliehriat, Nailar 07: Hadien ba ka Khasi Students Union Narpuh Circle ka la ïoh ïa ki jingujor na ki paidbah jong ka thaiñ khappud, kiba la pynpaw ïa ka jingsngew khia halor ka jingsuki palat ka jingpyntrei ïa ka jingkieng ha khappud kaba don ha shnong Shymplong, ka seng ka la dawa na ka tnat C.P.W.D ba ka dei ban pynkloi ïa ka jingpyntrei ïa katei ka jingkieng khnang ba kan nym buh jingeh ïa ki paidbah jong ka thaiñ khappud ha ka leit ka wan.
La ong ruh ba ka tnat C.P.D.D mynta ka la sdang ban pyntrei ïa katei ka jingkieng ha Shymplong kaba la shah rong bad shah kit noh ha ka um ha ka por ba jur bha u slap ha ki khyndiat bnai ba la leit, ka jingjot jingpra katei ka jingkieng ka la buh jingeh ïa ki paidbah ka thaiñ khappud khamtam ha ka kit ka bah, ka leit ka wan bad haba wan lap ka pang ka shitom, kumta ki paidbah ki la shu ap khmih lynti ban pyndep noh ïa katei ka jingkieng, hynrei kane ka jingkhmih lynti bad ka jingangnud ki paidbah ka pyn lynga mynsiem pynban ïa ki namar ki ïohi bad lap ba ka jingpyntrei ka long kaba suki palat, kumta ka KSU Narpuh ka buh da ka jingdawa na ka tnat CPWD ba ka dei ban pyntrei kloi ïa katei ka jingkieng namar ki paidbah ki shem shitom bha ha ka leit ka wan naduh ban dkut katei ka jingkieng.
Kum ban shu phai dien , katei ka jingkieng ( RCC Bridge No 54/1), kaba don hajan ka shnong Shymplong ka dei kaba la shah rong noh ha ka um myn ha ka 17 tarik u ïaïong 2022, ka um kaba lat-lat ka la rong lut ploiñ bad ka la buh jingeh haduh katta katta ïa ki paidbah ka thaiñ, khamtam haba wan lap ka pang ka shitom bad kumjuh ruh ha ka kit ka bah namar ka dei tang kane ka jingkieng kaba pyniasoh ïa kiba bun bah ki shnong ha ki thaiñ khappud ha East Jaiñtia Hills District.
Ki nongshong shnong jong ka shnong Shymplong bad ki shnong ba mar jan ki iathuh ba lada ki donkam bad leit sha Khliehriat, sha Umkiang ki hap ban iaid da ka kjat na kawei ka jingkieng ïaid kjat (Hanging Bridge) kaba don ha ka wah Lukha tat haduh ba kin da poi ha surok national highway ha Sonapyrdi, la ong ruh ba naduh ba julor katei ka jingkieng ym don kali shuh ki ban wan bad leit sha ki shnong khappud kiba dei iaid lyngba na katei ka jingkieng kiba kynthup ka shnong Huroi, Hingaria, Lahaleiñ, Lejri bad kiwei kiwei ki shnong.
