Nongpoh, Nailar 07: Hadien ba ïa ka shnong Umden-Diwon la pynbna paidbah ne la tip kum kata ka Eri Silk Village halor ka jingpaw ha ki kam thaiñ jaiñ bad ki jingthir ksai na u Khñiang Ryndia bad kane ka Shnong ka la daw paw pyrthei ha kaba ka sorkar jylla lyngba ka tnad Handloom and Textile ha ka Sngi Saitjaiñ ka la lah ban plie sa ïa ka ophis treikam ba la tip kum ka Design Innovation Resource Centre (DIRC) ha ka shnong Diwon ba la wan plie da u Myntri ba peit ïa ka tnad Handloom and Textile, u Bah Banteidor Lyngdoh.
Kane ka jingplie ïa kane ka Design Innovation Resource Centre ka dei ruh shi bynta ka jingrakhe ïa ka 8th Edition National Handloom Day bad kumjuh ruh ïa ka Har Ghar Tiranga Prokram.
Ha kane ka sngi nalor ka jingplie u Myntri ba dei peit ïa ka tnad Handloom & Textile, u Bah Banteidor Lyngdoh ïa ka Design Innovation Resource Centre, la sakhi lang ruh da ka jingdon lang u MLA ka Nongpoh, u Bah Mayral Born Syiem, u MDC ka Nongpoh, u Bah Balajied Rani, u DC ka Ri Bhoi, u Arpit Upadhyay, u Commissioner Secretary ka tnad Handloom and Textile, u Bah F.R Kharkongor bad kynthup ki nongïalam shnong bad ki paidbah ka thain Umden.
La sdang ruh ïa kane ka prokram da ka jingpynher ïa ka lama lai rong shi bynta na ka Har Ghaar Tirangna Prokram bad la ioh ruh ki jingpyni nam ïa ki jaiñ ba la dep thaiñ bad pynwandur da ki nongthaiñ jaiñ na ka shnong Diwon ha Umden.
Haba kren ha kane ka sngi, u Commissioner Secretary ka tnad Handloom bad Textile, u Bah F.R Kharkongor, u la ban khia halor ki kam shna kti bad ki kam thaiñ jingthaiñ lyngba ka tnad Sericulture bad Weaving ba kin pynmih ïa kita ki jaiñ ba la thaiñ da ki nongthaiñ jain bad kiba ai rong ruh khlem da pyndonkam dawai (Chemical) ba la tip kum kita ki organic dying lane ha ka ktien Khasi ka rukom wieh rong kaba ki pyndonkam khlem da wieh dawai da kaba ki pyndonkam da ki rong ba ki shu shna da ki kynbat ba ioh na ki khlaw ki btap
U la pynpaw ruh halor ki song jingïarap na ka sorkar kmie lyngba kata ka scheme Silk Samagra Scheme la mang tyngkha haduh 23 klur sha ka tnad Handloom and Textile ba ka jingthmu ka long ban kyntiew ïa ki kam thaiñ jaiñ khamtam ka Raid Nongtluh ha Ri Bhoi kan sa ioh shibun ki jingmyntoi na kane ka skhim sorkar kmie.
Na ka liang u Myntri ba dei peit ïa ka tnad Handloom and Textile, u Bah Banteidor Lyngdoh haba kren ha kane ka sngi u la ai ka burom sha ki ophisar sorkar, namar dei lyngba jingtrei shitom jongki bad ryngkat ka jingïasnoh kti lang ki nongthaiñ jain la lah ban kyntiew ïa ka kam thaiñ jaiñ bad khamtam ha kaba ïa dei bad ka jingpynmih ïa ki jaiñ Ryndia ba ka jylla ka paw ha ka pyrthei na ka shnong Umden-Diwon ba la tip kum kata ka Eri Silk Village.
