Wan shakhi u Myntri Rangbah ïaka jingdap 25 snem ka Thomas Jones Synod College, Jowai
Kular ban pynrung hapoh ka ‘People's College Grant-in-aid’ ïa ka TJSC haka 2nd Phase

Jowai, Nailar 05: U Myntri Rangbah jong ka sorkar jylla u Conrad K Sangma mynta ka sngi ula wan ban sakhi ïa ka jinglehkmen dap 25 snem 1997-2022 ne ka (Silver Jubilee) jong ka Thomas Jones Synod College, Jowai haka jingïalang kaba la long ha phyllaw jong katei hi ka College bad ka phang jong kane ka jingrakhe ka long “The Journey: Gratitude and Hope”.
Ha kane ka sngi la wan synran lang ïa u Myntri Rangbah naduh u myntri ka tnad pule puthi bad kam pohïing jong ka jylla u ma Lahkmen Rymbui, u MLA ka Jowai Constituency ma Wailadmiki Shylla, u Rev. G.S. Lytan Moderator KJP Synod Mihngi Cum Chairman, Governing Body, TJSC, u Principal ka College Dr. D.G. Lyngdoh, u Prafulla Kumar Boro, MCS: Additional Deputy Commissioner, u Superintendent of Police West Jaiñtia Hills District u Shri. Bikram D. Marak, MPS, ki Pastor, ki Tymmen Basan, ki dkhot jong ki Jingïaseng kynthei nalor ki nonghikai bad ki samla pule.
Ïa ka jingïalang la pynïaid da u nonghikai ka College u W.E.H. Lamin, uba dei ruh u Convener Silver Jubilee, la ïoh ruh ka jingkren pdiang da ka kong L. Lytan Vice Principal, ka jingpule na ka ktien u Blei bad duwai na ka Dr. I. Dkhar Vice Principal Higher Secondary bad ka jingrwai na ki nonghikai bad ki samla pule jong ka College.
Haba ai jingkren kum u kongsan ula pynpaw ka jingsngewkmen ban ïadon bynta lang ban kane ka jinglehkmen jong ka College, khamtam eh ban ïoh bynta lang ban pashet ïa ki jingmut sha ki samla pule kiba dei ki lawei jong ka ri hi baroh kawei.
Ula kular ruh ban na ka bynta ka 2nd Phase yn ai jingai jingïarap ïa kane ka College lyngba lyngba ka People’s College Grant-in-aid Scheme jong ka sorkar jylla, khnang ba kane ka College ka dang lah ban jam shaphrang ban ai ka jingnang jingstad ïa ki samla pule, shuh shuh u ai ka jingïaroh ïa ka Managing Committee ba haduh ba ka College kala kynjoh sha u mawmer ba 25 snem da kaba kyrshah nalade hi ïa ki jingdonkam.
“Ka sorkar kala pyrshang ban wad ki lad ki lynti na ka bynta ki khun samla ba kin ïoh ka jingnang jingstad bad ki lad ban seng ïa ki kam ki jam, ha kaba ka sorkar mynta kala pyntriekam ïa ka Education Policy bad ka Youth Policy kaba long ka jingmyntoi ïa ki khun samla.
Shuh shuh ula pynsngew hapoh ka jylla ki don haduh 75% ka jingbun briew kiba don ha ka rta kaba hapoh 35 snem, kumta ka long kaba donkam ban pynleit jingmut na ka bynta ki khun samla ïa kaei kaba ki thrang ha ka jingim.
Ula kyntu ïa ki samla pule ba kim dei ban don ka ïa ka thong kaba rit hynrei dei ban don beit ïa ka thong kaba heh bad kiba shemphang ban jied ïala ka jingim ha ka lynti kaba dei, kata ‘ban bud ïa ka jingsngew kaba don ha ka mynsiem ym ïa ki jingpynshoi kiba wan ha ki jingmut jingpyrkhat’ ong u Conrad.
Hadien kane u Myntri Rangbah ula ot ruh ïa u cake jong kane ka jingdap 25 snem ka College bad plie ruh ïa u maw nongrim jong ka Science Block lyngba ka jingïarap pisa jong ka Rashtriya Uchchatar Shiksha Abhiyan (RUSA) MHRD jong ka sorkar kmie.
Shi bynta na kane ka jingrakhe Silver Jubilee ka College kala ïoh ban pynlong shibun ki prokram bapher bapher naduh ka naduh ki jingïakop ï Debate, Spelling Bee, thoh Essay, Poetry, Quiz, ki jingïalehkai Chess, Basketball, Marathon, ka jingïakop shad bad rwai tynrai bad kiwei kiwei de.
Kyndiat shaphang ka Thomas Jones Synod College Jowai la seng ïa ka ha ka snem 1997 ïa kaba la ai kyrteng ïa ka haka kyrteng jong uwei na ki Missionary na ri Welsh u Rev. Thomas Jones uba dei ruh u kpa jong ki dak thoh dak tar (Khasi Alphabet) kaba don ïa ka moto “Tip Briew Tip Blei”.
La sdang shwa da ka Collage miet ha ka kyrdan Class XI Arts bad B.A General Course ïa kaba la plie ha ka 5th August, 1997 ha District Library, nangta la pynkynriah sha KJP Synod School, Mission Compound Jowai, haka 1999 la pynkynriah sha Rymbai Gas Agency Iawmusiang.
Da ka jingtrei shitom jong ki bor pynïaid ka College la lah ban plie ïa u maw nongrim ban tei ïa ka College ba pura ha ka 15 tarik April, 2006 da u (L) P. R. Kyndiah (MP) Lok Sabha bad ha ka 6 tarik u 2008 kala ïoh ban sdang hala ka jong ka College Campus, ha ka 29 May 2012 la plie Building jong ka College da u Paban S. Ghatowar, Minister of state for North Eastern Region, nangta la mih sa ka Commerce Stream bad ka Science Stream. Ka College kala ïoh ruh ka jingithuh da ka NAAC ha ka 3 tarik July 2018 da kaba ïoh ïa ka kyrdan Grade-B.