Plie u Bah Pius Marweiñ ïa ka ïing skul jong ka Mawmerang Presbyterian LP School

Mawkyrwat, ‘Nailar, 05: U bah Pius Marweiñ uba long u Nongmihkhmat jong ka Ranikor Constituency bad kum u kongsan mynta ka sngi thohdieng u la ïoh ban plie bad ot ribon ïa ka ïing skul jong ka Mawmerang Presbyterian Lower Primary School (MPLPS) kaba la shna pynheh (Extension Building) kaba dei na ka MDC Scheme kaba hapoh jong ka “15 FC Untied Grand jong u snem 2021 – 2022” ha ka jingmang T. 2 lak 50 hajar tyngka ha Shnong Mawmerang, South West Khasi Hills District.
Haba kren kum u kongsan, u bah Pius Marweiñ u la pynpaw ka jingsngewkmen ban ïohi ba ïa kane ka jingtei la ïoh ban pyndep wat ha i por iba lyngkot ruh bad ai ba da ka jingïoh ban pyndep bad pynheh ïa kane ka jingtei lyngba ka kamra klas kan sa long ka jingïarap bad ai mynsiem na ka bynta ki hep kiba rit ba kin mih shakhmat ban wad ki lad ki lynti ha ka liang ka pule puthi lyngba ka jinglam lynti jong ki kmie ki kpa.
“Ban pyntyllun bad kyntiew ïa ka pule puthi ka donkam nyngkong ïa ka ïing skul, ki nonghikai bad kumjuh ruh ka jingkyrshan na ki kmie ki kpa lem bad ki khun ki kti jong ki namar lada don tang ka ïing skul khlem ki nongpule ka long leh noh ei bad lada don tang ki khynnah skul khlem ki nonghikai kata ruh ka bym lah ban long”, ong u bah Pius. Namarkata, u la buh ka jingkyrpad na ka bynta ki paidbah nongshong shnong ba kin ai ka jingïatreilang ha ki liang baroh khnang ba ka pule puthi ha ka dong ka thaiñ kane long kaba kiew bad long kaba phyrnai.
Ha kajuh ka por u la ai mynsiem ruh na ka bynta ki hep kiba rit watla kim pat da don kata ka jingpyrkhat kaba janai hynrei ki dei ban long ki khun kiba kohnguh sneng bad burom ïa ki nonghikai naduh ba ki dang rit ka karta.
Haba kren npat na ka liang ka Balang Presbyterian Mawmerang lyngba u T.Bn. S.P. Thongni u la pynpw ka jingaikhublei na ka bynta u MLA ba u la sngap bad shahskhor ïa ka jingkyrpad jong ka Balang lyngba ka Managing Committee ban leh ei ei lem na ka bynta kane ka skul. U la ïathuh tuh ba kane ka skul ka dei ka projek jong ka Balang ban ai ki jinghikai ha ka liang ka jingstad ba kynjadoh lyngba ka akor ka burom bad kumjuh ruh wat ha ka jinghikai ba kynja mynsiem bad ba kin nangsan nangroi ha ki liang baroh.
Ha kane ka sngi la ïa don lang naduh u Headmaster jong ka skul u bah Skipdarly Tongwah, ki nonghikai, ki khynnah skul, ki rangbah jong ka Balang Presbyterian Mawmerang, ki nongïalam shnong bad ki kmie ki kpa.
Ha kane ka sngi la pynïaid ïa ka jingïalang da u bah Shiningstar Wanniang.