Shah pynkup burom u Bransley & Wilynder hadien ka jingjop ha ka NPC Worldwide Kazakhstan Pro Qualifier 2026

0

SHILLONG, Naiwieng 18: Hadien ka jinglah ban ïoh khur ïa ki namjop bapher bapher ha ki lympung ïakop pyni dohksah kiba la pynlong hapoh ka jylla bad ha ka Ri ruh, mynta ka sien ruh u samla Bransley D Nongkynrih napoh ka Iron House Gym ula lah biang ban wanrah nam bad burom ïa ka jylla bad ïa ka Ri hi baroh kawei da kaba khur ïa ka jingjop ha ka lympung ïakop pyni dohksah kaba la long shabar Ri, kaba la tip da ka NPC Worldwide Kazakhstan Pro Qualifier 2026 ha Almaty- Kazakhstan, kaba la long ha ka 07 tarik u Naiwieng.
Kaba pynsngewsarong shuh shuh ïa ka jylla Meghalaya ka long ba nalor u Bransley, u samla rangbah Wilynder Khonglam ruh ula wan ha ka kyrdan kaba saw ha kane kajuh ka lympung.
Na ka liang ki bahaïing hasem ki paralok parajor jong u samla Bransley bad u Wilynder ki la pynkup burom ïa kine ki arngut hadien ba ki la wanphai ha ka prokram kaba la pynlong ha Hidden Hills Resort kaba don ha Diengïong New Shillong. ïa kane ka prokram pynkup burom la pynïaid da u samla Gordon J Thabah.
Haba ai jingkren ha kane ka jingïalang na ka liang u samla Bransley ula ïathuh ba ka shimpor ïa u haduh kumba arsnem ban pynkhreh ïa kine ki jingïakop bad ïathuh ba ka jingangnud bad jingthrang jong u ka long ban ïoh ïa ka Pro Card ha ka kam Body Building.
Ula pynpaw ruh ïa ka jingkmen namar ki briew kiba kongsan ha ka jingim jong u kiba kynthup naduh i lok ki kmie ki kpa ki hynmen para bad ki paralok parajor baroh ki ju ai mynsiem bad kyrshan ïa u ha ka jingïaid lynti jong u ban ïakhun ha ka lympung kaba don shabar ka Ri.
Kumban shu pynkynmaw u Bransley D. Nongkynrih ula wanrah ïa ka nam da kaba khur ïa ka takma ksiar ha ka kyrdan ïakop jong ka Classic Physique – A Category bad hashwa jong kane ula jop ruh ha ka kyrdan jong ka Classic Physique and Bodybuilding ha ka lympung ïakop jong ka Sheru Classic NPC Regional North India Championship kaba la pynlong ha Chandigarh ha ka 11 tarik u Risaw 2026.
La pynbyrngia ïa ka prokram ha kane ka janmiet lyngba ki jingrwai kiba la rwai da ka samla Sarah Lee bad u samla Shanlang Laloo bad kiwei kiwei.
La pynkut ïa ka prokram lyngba ki kyntien ai khublei na ka Doctor Wakaru Shullai.

Leave A Reply

Your email address will not be published.