SSA Champions Cup: Pynliem ka Mawpat da 9-1 ïa ka Lamlynti; Jop ka Mawkhar ïa ka Sei La Sap

0

Shillong, Naiwieng 16: Ka Mawpat SC ka la mad ïa ka jingjop kaba paka ha ka Group A da kaba pynliem haduh 9-1 kol ïa ka Lamlynti FC ha kawei naki jingïalehkai jong ka lympung SSA Champions Cup 2026 hynne ka sngi Nyngkong ha SSA Stadium.
Katba Mawkhar SC ka la pynliem da 1-0 ïa ka Sei La Sap FCC ha ka jingïalehkai kaba bud jong ka Group B.
U Thompson Lyngdoh (46’, 51’, 70’) u la thep ïa ka hat-trick kaba ar jong ka lympung ha kaba ka Mawpat ka la tehlakam ïa baroh kawei ka jingïalehkai. Kiwei pat ki kol jong ka Mawpat la thep da u Donboklang Lyngdoh (17’, 87’), u Denelson Pyngrope (27’P, 74’P), u Sparkle Khongshei (35’) bad u Dajiedlang Wanshnong (53’). Ka shi kol jong ka Lamlynti la thep da u Ialam Kshiar (20’).
Na ka bynta ka Mawkhar, ka kol ba la thep da u Ibanjop Kharjahrin (77’), uba la mih bujli ha ka kylla miet, ka la long ka jingïapher kaba pynïakhlad ïa ka jingïakhun ban poi sha ka jingïakhaid.
Ka la long ka jingpyrshang thep kol ha kiba bun ki khep na ka bynta ka Mawpat, watla katto katne ki long kiba duna. Ka jingshah ñion ka long kaba khlem sangeh ïa ka Lamlynti, bad watla ki don katto katne ki jingpyrshang ki bym shym la seisoh ha kaba sdang, hynrei ka paw shai ba ka kynhun kan sa shah thep ha kano kano ka por.
U Donboklang u la thep ïa kaba nyngkong na ka bynta ka Mawpat hynrei ka Lamlynti ka la lah ban weng ïa kane da ka kabu kaba nyngkong eh ba ki la ïoh lyngba u Ialam.
Hynrei kane ka kol ka la paw ba kadei artad ka khyllipmat jingkmen kaba khatduh jong ka Lamlynti, ha kaba ka Mawpat ka la pynkhihjar kawei hadien kawei ban khur ïa ka jingjop. Ka Mawpat ka la lamkhmat da 3-1 shuwa ban jam sha ka por shongthait, bad ka la bynrap sa hynriew tylli ki kol ha ka kylla miet.
Ka jingjop ka mut ba ka Mawpat kan wanphai biang ha khlieh duh jong ka Group A, da kaba kamai mynta 7 poiñ na ki lai tylli ki jingïakhun. Ka Mawlai SC ka bud ha ka kyrdan ba-ar da 6 poiñ bad ka dang sah kawei ka jingïalehkai ha kti. Ka Lamlynti ka wan ha ka kyrdan ba lai da 3 poiñ.
Ha ka jingïalehkai kaba bud, ka Mawkhar ka la kam ïa ka kyrdan ba-ar ha ka Group B da ka jingjop kaba tang 1-0 kol pyrshah ïa ka Sei La Sap lyngba ka kol jong u Ibanjop.
Ha kane ka sngi Ba-ar ka Sohryngkham SC kan aireng pyrshah ïa ka Sanmer SC ha ka por 11 baje mynstep ha ka Group B, bud sa ka jingïakhun hapdeng ka Mawpdang SC pyrshah ïa ka Nongkrem SC ha ka por 2:30 baje nohphai sngi ha ka Group A.

Leave A Reply

Your email address will not be published.