Ban pynmih pisa na ka bynta ka skul pynlong ka Hingaria SS da ka Knock-Out Football Tournament

6 lak tyngka shisnem pynlut ka Dorbar Shnong ban siew tulop ïa ki nonghikai

0

Khliehriat: Ka shnong Hingaria, East Jaiñtia Hills District ka dei ka shnong kaba don ha khappud bha bad ka ri Bangladesh, ka School Managing Committee jong ka Hingaria Secondary School ha ryngkat ka jingïa-treilang bad ka Dorbar Shnong Hingaria hynnin ka sngi saitjaiñ ka la pynlong ïa ka jingplie ïa ka Knock-Out Football Tournament ha shnong Hingaria khnang ban pynmih pisa na ka bynta ka skul bad kaba sngew-tynnad ruh ban tip ba ka Dorbar Shnong Hingraia ka ju pynlut haduh 6 lak tyngka man la u snem ha kaba siew tulop ïa ki nonghikai bad kane ka pawshai ba ka dorbar shnong ka don shisha kata ka jingkitkhlieh ban kyntiew ïa ka jingnang jingstad ha shnong ha thaw bad ruh ban tehlakam ïa ka jingpep skul noh shiteng por ki khynnah.
Ka khusnam na ka bynta kane ka tournament kan long san lak tyngka. Ki don haduh kumba 26 tylli ki khynhun ïalehkai na ki Sport Club bapher bapher kiba la wan ban ïashim-bynta ha kane ka Knock-Out Football Tournament ha Hingaria bad ki kynhun kiba la ïalehkai ha kaba sdang jong kane ka tournament ki dei ka Lawa-soni Sport Club kaba na shnong Hingaria pyrshah ïa ka Jaiñtia Hills Academy Khlieh-riat, ka jingïakhun ka la long kaba ïaryngkatbor ha kaba ka Jaiñtia Hills Academy Khlieh-riat ka la jop bad pynliem ïa ka Lawa-soni Sport Club da shi 1-0.
Shuh shuh, la pynbyrngia ïa kane ka sngi plie ïa ka tournament da ka jingrwai na u kaitor ba na ki thaiñ khappud u bah Briwing Khonglam.
Haba kren kum u kong-san, u bah Daiapherbha Lamare, u la ai ka jingïaroh ïa ka jinglah ka dorbar shnong Hingaria kaba lah ban pynmih ïa ka pisa haduh hynriew lak tyngka manla u snem ban siew tulop ïa ki nong-hikai kiba hikai ha Hingaria Secondary School bad ong ba kane ka pawshai ba ka shnong ka don shisha ïa ka jingangnud ban kyntiew ïa ka jingnang jingstad, u la ai ka jingkitbok kitrwiang ïa ki nongpynïaid shnong kumjuh ruh ki bor pynïaid skul ba kin nang kiew shaphrang bad ngeit ruh ba kane ka jingpynlong ïa kane ka football tournament kan long kaba jop bad kan long ruh ka lad ban pynmih bun ka pisa ban ïarap lem ha kaba siew tulop ïa ki nonghikai. “Ngeit skhem ba kane ka skul kan ïarap shibun ïa ki khynnah ha ka pule puthi, nga kitbok ïa ki nonghikai, ki dkhot ka SMC ba kin nang ïoh ïa ka bor,ka jingshemphang, kin ïoh ruh ïa ka mynsiem ban ïatreilang ha kaba kyntiew shuh shuh ïakane ka skul namar ka jingnang jingstad ka lah ruh ban wanrah ïa ki jingkylla ha ka imlang ka sahlang” ong u kongsan.
Haba kren pat ha kaba ïadei bad ka jingïalehkai phut-bol, u kongsan u kyntu ïa ki rangïalehkai kiba shimbynta ha kane ka lympung Knock Out Football Tournament ha Hingaria ba kin shim ïakane kum ka rynsan ha kaba ki lah ban pyni ïa ka sap ka phong jong ki ha ka kam ialehkai football , u kyntu ruh ba kin long kita ki rangïalehkai kiba don ka mynsiem ban kongnguh ïa ki nongpynïaid, ban long kiba beit ba ryntih ne ban bat ïa ka decipline, u la ong ruh ba ka madan Futsal kaba don ha shnong Hingaria ka dei lyngba ka jingïarap ka MLA ka kong Santa Mary Shylla, u kyntu ïa ki nongpynïaid shnong ba kin ïakynduh ïa ka MLA ban wad ïa ki lad ki lynti ban ïarap lem ïa ki ha kaba ïadei bad ka skul Hingaria Secondary School.
La ïoh jingkren ruh na u Rangbah Shnong Huroi, u bah Raja Suchen bad ki riew rang-bah kiba la ïadonlang ha kane ka sngi ki long u Rangbah shnong Lahaleiñ, u bah Mit Dkhar, Secretary shnong Hingaria, u bah Hamilton Pohtam, Chairman SMS, u bah Ephesos Talang, u Cluster Resource Person,u bah Shimpor Niangti.

Leave A Reply

Your email address will not be published.