Mih ki nongri syiar ka Ri-Bhoi sha surok shiteng synñia, dawa ban tehlakam ïa ki syiar nabar jylla

Nongpoh, Naiwieng 12: Ki nongri syiar ka them Ri-Bhoi hapoh ka lama jong ka Ri-Bhoi Poultry Farmers Association (RBPFA) ki la mih paidbah sha surok hynnin ka miet, ban pynpaw ïa ka jingsngewkhia halor ka jingwan tuid jong ki syiar na bar jylla, kaba la ktah jur ïa ka kamai kajih jong ki nongri syiar trai jylla.
Ha kane ka jingmih paidbah, ki dkhot jong ka seng, naduh ki samla haduh ki longkmie, ki la pynlong ïa ka jingap kali kit syiar ha Pahammawleiñ, hadien ka jingioh jingtip halor ka jingwan tuid jong ki syiar na bar jylla. Ki nongri syiar ki pynpaw ba kane ka jingwan bun palat jong ki syiar nabar ka la pynhiar dor ïa ki syiar ba ki pynmih, ha kaba kim lah shuh ban die ha ka dor kaba lah ban siew ïa ki jinglut jingsep kiba ki pynlut ha ka jingri syiar, khamtam eh ka dor jong ki jingbam syiar kaba dang rem.
Katkum ka jingong jong ki nongri syiar, kane ka jinglong jingman ka la pynlong ïa kiba bun ban duh mynsiem bad ban pyrkhat ban sangeh noh ïa ka kam ri syiar, watla ka sorkar jylla ka ju kyntu ïa ki samla ban seng ïa ki kam lajong bad ban long kiba ïeng ha la ki jong ki kjat.
Watla ha katei ka miet kim shym la lap ïa ki kali kit syiar kiba wan, lehse na ka daw ba ki nongñiah kali ki la ioh jingtip shwa shaphang ka jingap jong ka seng, hynrei ka RBPFA ka la pynpaw ba kan dang bteng ïa kane ka jingïakhih haduh ban da ïoh ïa ka jubab bad ka jingpynbeit kaba shai na ka sorkar jylla.
Ka seng ka la pynpaw ba ki mat dawa jong ka ki kynthup ïa ka jingbuh ïa ki jaka talasi ban peit bniah ïa ka jingwanrah syiar na bar jylla, khnang ban pynthikna ïa ka koit ka khiah jong ki syiar bad ban khanglad ïa ka jingwanrah ïa ki jingpang. Nalor kata, ka seng ka dawa ruh ban pynbeit ïa ka iew bad ka dor jong ki syiar khnang ban ïada ïa ka kamai kajih jong ki nongri syiar trai jylla, bad ban ai jingkyrshan lyngba ka subsidy ha ki jingbam syiar.
Haba kren sha ki lad pathai khubor, u Samla Aibor Shadap, Vice-President jong ka RBPFA, ryngkat bad u Samla John Maring, uba dei uwei na ki nongri syiar ka Ri-Bhoi, ki la pynpaw ïa ka jingsngewkhia kaba jur halor ka jingbym shimkhia jong ka sorkar ïa kane ka jingeh.
Ki la ong ba ki kali kit syiar na bar jylla ki ju wan ha ka por shiteng synñia haduh ban da kylla step. Ki la bynrap ruh ba ka dor ba die ïa ki syiar trai jylla kam long shuh kaba ïahap bad ka jinglut jingsep naduh ka jingsdang ban ri haduh ka por ban die, katba ki syiar na bar jylla pat ki wan ha ka dor kaba kham tad, kaba pynlong ïa ki nongri syiar trai jylla ban duh nong bad ban ïakynduh ïa ka jingeh kaba khraw ha ka kamai kajih.