Pynlong ka KJDTSA Mawkyrwat Zone ïa ka shong kyllaiñ mungor ba arsngi ha Mawkyrwat

By Mawphor Editor On Nov 13, 2026

Mawkyrwat, Naiwieng 12: Ka Khasi Jaintia Deficit School Teachers’ Association (KJDSTA), Mawkyrwat Zone, ka la pynlong ïa ka Sit-in Protest (Dharna) ba ar sngi lynter, kata ha ka 11 bad 12 tarik u ‘Naiwieng, 2026, kum ka dak jong ka jingïatylli bad ka jingai jingkyrshan ïa ka Central Body, ban dawa na ka Sorkar ïa ka jingpyntreikam noh ïa ki jingdawa bad ki jingeh kiba la slem bha jong ki nonghikai Deficit School.
Ïa kane ka Sit-in Protest (Dharna) ha Mawkyrwat Zone la lamkhmat da u Bah Nicholas Tympuin, President, bad u Bah R. Marbaniang, Secretary jong ka Khasi Jaintia Deficit School Teachers’ Association (KJDSTA), Mawkyrwat Zone, ban pynsngew sha ka Sorkar ïa ki jingeh bad ki jingdawa jong ki nonghikai Deficit School, bad kyntu ïa ki bor ba dei peit ba kin shimkhia ban pynbeit ïa kine ki jingeh.
Katkum ka jingpynbna ba la pynmih da ka Association, ïa kane ka jingïakhih la pynlong hapoh ka phang pdeng, “Unity, Solidarity, Justice”, ryngkat bad ka kyntien pynshlur, “United We Stand, Divided We Fall – Justice for Deficit Teachers!”
Lyngba kane ka jingïakhih, ka Association ka la pynpaw ïa saw tylli ki jingdawa ba kongsan, kiba kynthup ïa ka jingpyllait noh mardor ïa ka tulop kaba dang sah jong ka DA Arrears, ka jingpynphai biang ïa ki hok jong ki nonghikai ha kaba ïadei bad ka Pension, ka jingïada bad pynneh pynsah ïa ka rukom treikam jong ki Deficit School, bad ka jingai ïa ka hok, ka burom bad ka jingshngaiñ ha ka liang ka pisa tyngka ïa ki nonghikai Deficit School.
Ka Association ka la ban jur ba kine ki jingdawa ki long kiba donkam ban ïada ïa ki hok, ka bha ka miat bad ka jingshngaiñ ha ka liang ka pisa tyngka jong ki nonghikai kiba shakri ha ki Deficit School. Ka la kyntu ruh ïa baroh ki nonghikai ba kin ïatylli bad ïeng skhem ban pynkhlaiñ ïa ka jingïakhun na ka bynta ban ïoh ïa ka hok bad ban pynbeit ïa ki mat kiba dang sah.
Ha kaba kut, ka Association ka la pynskhem biang ïa ka jingkular jong ka ban ïeng tylli bad ka Central Body ban buddien bad pynurlong ïa ki jingdawa kiba dei hok jong ki nonghikai, bad ban ïada ïa ka lawei jong ka rukom jong ka jinglong jingman ha ki Deficit School.