Mynta ka sngi yn sdang ka NTPC Senior National Archery Championship ha Shillong

SHILLONG, Naiwieng 11: Ka NTPC Senior National Archery Championship kan khreh ban sdang ha kane ka sngi Palei, ka 12 tarik Naiwieng, ha Parade Ground ha Umsawli, Shillong.
Mynta u snem ïa kane ka lympung la pynlong da ka Archery Association of Meghalaya hapoh ka jingpeit jong ka Archery Association of India, bad kan kut ha ka 17 tarik u Naiwieng. ïa kane ka jingïakop la pynlong ryngkat ka jingkyrshan na ka tnad Sports jong ka sorkar Meghalaya.
Na ka liang jong ki bor pynïaid ki la khmih lynti ba kin don haduh 1,000 ngut ki nongïalehkai na ki 44 tylli ki synjuk ki ban shim bynta ha kane ka jingïakop siat khnam kaba hynriew sngi. ïa ka Meghalaya yn mihkhmat da ki 23 ngut ki nongsiat khnam.
Kane ka Championship kan wanrah lang hajuh ïa ka jingïakhun jong ka 46th Senior Recurve, 22nd Senior Compound bad ka 33rd Senior Indian Round National Championships na ka bynta ki shynrang bad kynthei.
Ha kane ka sngi Palei (12 tarik Naiwieng), kan don ka wat ïaknieh rung lane qualification jong ka Men’s Recurve ha ka por 8 baje mynstep, bud sa ka jingïalang plie pyrda ïa ka lympung ha ka por 10:30 baje mynstep. Nangta ka wat ïaknieh rung jong ka Women’s recurve kan long ha ka por mynsngi.
Ka jingïakop ha ka Compound Event kan sdang ha ka 13 tarik u Naiwieng bad ka Indian Round Event ha ka 14 tarik u Naiwieng. Ka lympung kan jam sha kaba kut ha ka sngi Ba-ar, 17 tarik u Naiwieng, da 15 tylli ki jingïakhun ïaknieh takma ksiar ha kylleng ki kyrdan naduh ka Individual (marwei), team (kynhun) bad mixed-team (shijur) Event.
Lah ban kdew ba ka nongbah Shillong ka don ïa ka jingïadei kaba slem bad kane ka lympung, ka la pynlong ïa ka Senior Recurve National Championship kaba ar ha u bnai Risaw 1975, kaba 10 ha u Jymmang 1986, bad ka 20th Senior Recurve bad 6th Senior Indian Round National Championships ha u Naiwieng 1999. Ka nongbah ka la pynlong ruh ïa ka Junior National Championship ha u bnai Nohprah 2011.
Ka siat khnam (Archery) ka la long ka bynta kaba la slem jong ka jingim tynrai jong ka jylla Meghalaya kaba dang ïai bteng haduh mynta.
Ka Jylla ka la saiñdur ruh ïa kane ka jingïalehkai ba mynta, ha kaba u Woodward Sohliya ba la khlad noh, u la long uwei napdeng ki nongprat lynti jong ka Indian Round, kaba la thaw ha u snem 1989 bad kawei na ki lai tylli ki rukom ïakhun ha kane ka lympung ïalehkai.
Ha ka taïew ba la dep, ka West Khasi Hills District ka la pynlong ïa ka ‘Jingïakop Siat Khnam Tynrai’ ha ka 22 tarik u Risaw kum shi bynta ban rakhe ïa ka Jubili ksiar jong ka. ïa ka Meghalaya State Archery Championship la pynlong ha Sports Authority of India, NEHU Campus, naduh ka 11 haduh ka 13 tarik u Nailar, ha kaba la wan ban ïashim bynta da palat 200 ki nongsiat khnam bad ki nongpynïaid na baroh 12 tylli ki District.