Lyngba ka lynti rel ka kyntiew ka rep ka riang bad ki ïoh ka lad ban die ïa ki mar rep jong ki: DC NGHD

Shillong, Nohprah 10: Ka kynhun jong ki nongthoh khubor na Shillong, kum shibynta jong ka jingleit jngoh ïa ki nongthoh khubor ba la pynlong da ka Directorate of Information and Public Relations (DIPR) ha ka sngi Nyngkong, ki la leit jngoh ïa ka North Garo Hills district, kaba kynthup ïa ka Steshon Rel Mendipathar, kaba dei ka steshon rel kaba nyngkong eh ha ka jylla Meghalaya.
Ha kane ka jingleit jngoh ka Deputy Commissioner jong ka North Garo Hills district ka M.S.N. Marak, IAS, ka la pynpaw ïa ki jingmyntoi kiba kongsan jong ka jingpynïasoh rel na ka bynta ki paidbah jong ka thaiñ, khamtam ki nongrep, da kaba pynbiang ïa ka lad kaba suk bad kaba rem dor ban leit sha ki ïew shabar ka Jylla.
Ka Marak ka la ong ba ka jingshakri lynti rel ka la pynlah ïa ki nongrep ban kit ïa ki jhur ba dang shu kheit bad kiwei kiwei ki mar rep sha Guwahati, ha kaba ki lah ban die ïa ki mar rep jong ki bad ban wanphai sha la ïing ha kajuh ka sngi. Kane ka la pynduna shibun ïa ka jinglut jingsep ha ka leit ka wan katba ka ailad ïa ki nongrep trai ri ban leit sha ki ïew kiba kham heh.
Ka la kdew ruh ba ki jhur organic na kane ka thaiñ ki don ka jingdawa kaba jur bha ha Guwahati, kaba ailad ïa ki nongrep ban pynïaid iew ïa ki mar rep jong ki. Ka lynti rel ka la ïarap ruh ban pynduna ïa ka jinglut jong ki mar ba kongsan da kaba pynsuk ïa ka jingkit mar beit shapoh ka distrik.
Haba pynpaw ïa ka jingmyntoi jong ka jingpynïasoh rel ban ïa ki distrik ki bym don kum kine ki jingdonkam, ka Marak ka la ong ba ka jinglut jingsep ha kito ki jaka ka kham heh. Nalor ba ka pynsuk ïa ka leit ka wan jong ki mar rep, ïa ka Steshon Rel Mendipathar la pyndonkam ruh ban kit ïa ki mar ki mata sha ki nongbah kiba heh kum ka Kolkata bad Delhi, katba ki wanrah ïa ki mar na ki jaka sor kiba kham heh sha kane ka thaiñ.
Shuh shuh ka Deputy Commissioner ka la ong ba dang pynheh ïa ki jingtei jong ki lynti rel, kaba la khmih lynti ba kan khring shuh shuh ïa ki nongbei tyngka bad kan pynshlur ïa ka jingkiew ha ki karkhana ha North Garo Hills.
Ka la pynpaw ka jingkyrmen ba ka jingpynbha ïa ka jingïadei bad ka jingseng ïa ki karkhana kan wanrah ïa ki lad kamai kiba kham heh, kaba ai jingmyntoi ym tang ïa ki nongrep ha ka distrik hynrei kan ïarap ruh ïa ka roi ka par jong ka jylla Meghalaya baroh kawei.