Shillong, Naiwieng 10: Ka ding kaba klang bha kala bam duh ïa kawei ka godown ne ka jaka buh tiar ha ka thain Demseiñiong kaba don mar pyrshah bad ka ophis NEEPCO, Shillong hynne ka sngi Ba-ar.
Kane ka jingjia kala jia ha ka por 2:30 janmmiet.
La iathuh ba katei ka godown ka dei ban buh ïa ki tiar ba pyndonkam ha ki tent-house bad ki tiar ba ai wai ha ki jingïalang, kynthup ïa ki tiar ba pyndonkam ha ki jingkhawai shongkurim bad kiwei kiwei ki jingïalang.
Hynrei ïa ka jinglong jong ka godown kaba la shah ktah bad ïa ka jinglong jong ki mar ba la buh jong ka ym pat lah ban pynthikna.
Ki Pulit na ka tnad Fire and emergency services ne ki Pulit pynlip ding mar mar kila poi ha katei ka jaka bad ïakhun ban pynlip ïa ka ding.
Na ka liang u Superintendent of Police (SP) ka East Khasi Hills u Bah Vivek Syiem u la poi ha katei ka jaka ban beit bad khmih ïa ka jinglong jingman.
Tad haduh ba thoh ïa kane ka khubor ym shym la ioh jingtip ba bniah ha kaba ïadei bad kane ka jingshah bam duh ha ka ding bad ka jingshah pynjulor lane hato ki don ki briew kiba la mynsaw na kane ka jingjia.
