Nongpoh, Nailar 01: Ka ophis u Deputy Commissioner ka Ri-Bhoi District mynta ka sngi kala sdang ïaka jinglum ïaki Adhaar naki nongthep vote ban pynïasoh bad ka kyrteng thep vote jong ki bad kumjuh ruh ban ïada naka jingpynrung kyrteng jong ki briew sha kiwei pat ki constituency nalor ka kyrteng ba kila don.
Ïa katei ka jingsdang ban pynrung kyrteng lyngba ki adhaar la pynbna haka jingïalang kaba la long ha Conference Hall jong ka ophis u Deputy Commissioner ka Ri-Bhoi District, haka jingdonlang ka kong B Ranee Additional Deputy Commissioner, ERO, u Bah BJ Kharshandi Additional Deputy Commissioner ERO, Bah R Kharbihkhiew ADC, ERO, ka kong VA Hynniewta ADC, ERO bad kiwei kiwei.
Ha katei ka jingïalang la pynpaw ruh ïaka thong ba hakhmat eh jong katei ka jingthmu ban pynrung lang ïa u Adhaar haka kyrteng thep vote kadei katkum ka jingbthah jong ka Election Commission of India, Representation of People Act, 1950 bad ïa katei ka rukom yn sdang naduh ka 1 tarik Nailar 2022 ban pynthikna haka por ba pynrung kyrteng thep vote ban ïada ruh ba u juh u briew um dei ban don ar tylli ki kyrteng sha kiwei ki constituency lane haka juh.
