Nongpoh, Nailar 01: U wei u samla u la duh noh syndon ïala ka jong ka jingim hadien ba kawei ka auto kaba u ñiah kala shah tynrah hakawei ka kali Ford Endeavour kaba dang wan na Guwahati ban kiew sha Nongpoh.
Katkum ka jingtip bala ioh lum kane ka jingjia kala jia mynta ka sngi haka por 2:30 eiei janmiet hajan ka shnong Pahammawleiñ, Ri-Bhoi District ha kaba katei ka auto rickshaw kaba don ïa u number ML 10 B 3474 ka dei kaba ïaid naka liang bymdei (wrong side), kaba la pynlong ïa katei ka kali Ford Endeavour kaba don ïa u number ML 10 C 5786 kaba la pynher sted bad leit tynrah beit markhmat ïa katei ka Auto Rickshaw.
U tei u samla u ba la khlad noh ha kane ka jingjia, la tip kyrteng kum u Julius Nongsiej (28) naka shnong Umling Lambrang u ba dei u nongñiah jong katei ka auto rickshaw katba kiba la mynsaw jur ki kynthup ïa u Silbanus Lapang, 28 na Nongkylla Byrnihat bad u Bijoy Makri, na Sohpu Umling ïa kine baroh la pynkit marmar sha Civil Hospital Nongpoh.
Na ka liang ki bor pulit ka Nongpoh Police Traffic ki her mar mar sha katei ka jaka bad la rah ruh ïa u nongñiah ka Ford Endeavour u Sartaj Ansari (19) sha thanad ban pynlong ïa ka jingtohkit.
