Kyntu u DC ïa ki longkmie ba kin leit sha ïing hynrei lah ban bteng ïa ka jingïakhih

Shillong, Naiwieng 06: U Deputy Commissioner ka East Khasi Hills District u Abhilash Baranwal ha ka miet sngi Thohdieng dalade u la leit ban ïa kynduh ïa ki longkmie kiba pynlong ïa ka jingïakhih shong kyllaiñ myngor ha khmat dur mot u Woh Kiang Nangbah ban kyntu ïa ki ba kin leit phai shwa sha ïing sa bteng pat ïa ka jingïakhih ha ka sngi kaba bud.
Haba kren ha ki lad pathai khubor ha ka por ba u leit sha ka jaka ba don ka jingïakhih shong kyllaiñ myngor u la ong katkum ka jingbit kaba la ai ka long tang haduh ka por 4 baje janmiet hynrei haduh ka por 7 baje ruh ki dang don ha katei ka jaka bad kane ki la pynkheiñ ïa ki kyndon ka aiñ.
Hynrei na ka liang u DC u la ong namar kiba bun ki dei ki longkmie kumta na ka bynta ka koit ka khiah ka jong ki u la kyntu ba kin ïa leit noh shwa sha ïing bad ki lah ban bteng biang ïa ka jingïakhih ka jong ki ha ka sngi kaba bud.
U Deputy Commissioner u la ong ba u dang ïakren ïa ki ban pynsngewthuh hynrei ïa mynta hi ki dang ong ba kin dang don shwa hangtei hynrei na ka liang ki Magistrate ki Pulit kiba don ha kane ka jaka ki dang ïakren, wat la kila pynkheiñ ïa ki kyndon hynrei namar ba ki dei ki longkmie kiba la rangbah ka rta ba kim kwah ban don kano kano ka jingsngewthuh bakla kumta la kyrpad ïa ki ba kin sngap ïa ka jingkyrpad.