Plie u MLA Mawkyrwat ïa ka lynti ïaid kjat ha synrang Mawrin bad ka jingker ha Mawten

Mawkyrwat, ‘Naiwieng 02 : Kum shi bynta ban kyntiew ïa ka kam jngohkai pyrthei bad ban pynbha ïa ki jingtei paidbah, mynta ka sngi ka 2 tarik u Naiwieng, 2026, na ka liang u bah Renikton Lyngdoh Tongkhar, MLA ka Mawkyrwat Constituency kum u kongsan ula plie paidbah ïa ka lynti ïaid kjat (Trekking Trail) ha Synrang Mawrin, Mawten bad ka jingker (Fencing) ha phyllaw jong ka Balang Presbyterian Mawten.
Kine ki projek ki la long kiba la pyntreikam lyngba ka skhim Chief Minister’s Special Development Fund (CMSDF) jong u snem 2024 – 2025, kaba la wanrah ïa ka jingmyntoi ïa ki paidbah ka shnong Mawten baroh kawei ki long ïa ka lynti ïaid kjat (Trekking Trail) ha Synrang Mawrin, Mawten ka long T. 15 lak tyngka bad ka jingker (Fencing) ha phyllaw jong ka Balang Presbyterian Mawten ka dei ha ka jingmang pisa kaba T. 10 lak tyngka.
U Bah Renikton Lyngdoh Tongkhar, MLA ka Mawkyrwat Constituency, haba kren kum u Kongsan ha ka jingïalang kaba la long ha phyllaw jong ka Ïingmane Balang Presbyterian Mawten, u la pynpaw ba ka South West Khasi Hills District ka dang donkam ban trei shitom shuh shuh ban kyntiew ïa ki kam jngohkai pyrthei kumba long kiwei de ki jaka. Ha kajuh ka por, u la ong ba ka shnong Mawten ruh ka la sdang ban kiew bad ïaid shaphrang ha kaba kyntiew ïa kane ka kam, khamtam hadien ba ka Synrang Mawrin, kaba la plie paidbah ha ki snem kiba la leit noh, ha kaba ka la nang long kawei na ki jaka kiba khring ïa ki nongwan jngohkai pyrthei.
U la pynpaw ruh ba ka jingdon jong ki jaka jngohkai kiba itynnad kum ka Synrang Mawrin, kaba don ïa ki synrang maw kiba itynnad bad ki lynti ïaid kjat ne ki Trekking Trail na ka bynta ki nongwan jngohkai, ryngkat bad ka Ot Rngai bad kiwei pat ki jaka kiba don ha katei ka thaiñ, kin sa long ki lad kiba lah ban kyntiew shuh shuh ïa ka kam jngohkai pyrthei ha ka shnong Mawten. “Hynrei, na ka bynta ban pynurlong ïa kane ka thong, ka donkam ïa ka jingïatreilang kaba jan hapdeng ki paidbah nongshong shnong bad ki bor sorkar”, u la ong.
Haba kren shaphang ka jingpynbha ïa ka lynti ïaid kjat (Footpath) ban leit sha Ot Rngai, u Bah Renikton u la ong ba u la dep ban buddien ïa kane ka kam khnang ban pynïoh ïa ka mang tyngka na ka bynta ban pyntrei ïa ka. U la pyntip ruh ba kane ka jingthmu kan sa urlong shen bad ka mang tyngka ba la thme ban pynlut na ka bynta kane ka projek ka lah ban kot haduh T. 99 lak tyngka ei ei.
Halor ka jingpynsngew jong u Myntri jong ka Shnong Mawten ban pyndep ïa ka lynti ïaid kjat shaduh ka Synrang Mawrin, na ka liang u bah Renikton Lyngdoh Tongkhar u la ai jingmut ïa ka shnong ba ka dei ban wan ki lad ki lynti na ki ophisar sorkar khamtam eh napoh ka ophis jong u Block Development Officer (BDO) lyngba ka Viksit Bharat – Guarantee for Rozgar & Ajeevika Mission (Gramin) ne ka VB-G RAM G khnang ban ïoh pyndep kumba la khmih lynti.
Kiwei de kiba la ïadonlang bad kiba la ai jingkren ki long u Bah Lovingwell Lyngdoh, Myntri Shnong Mawten, ha ryngkat ki symbud kongsan kata u Bah Isagahah Lawrniang, MCS, Block Development Officer (BDO) jong ka Mawkyrwat C&RD Block, bad u Bah Carnes Sohshang, Co-Chairman jong ka Meghalaya State Development Reforms Commission, Sorkar Meghalaya.
Kiba la ïadonlang ha kane ka sngi ki long naduh ki para bangeit jong ka Balang Presbyterian Mawten, ki Seng Longkmie jong ka Shnong, ki Seng Samla jong ka Shnong lem bad kiwei de.
Ïa ka prokram la pynïaid da u Pastor H.A. Wanniang, Chairman jong ka Balang Presbyterian Mawten bad ka jingkren khublei na u Bah K.F. Lyngdoh, Secretary Shnong Mawten.