Shillong, Naiwieng 02: Ka Shillong Sports Association (SSA) ha kane ka sngi ba-ar (03 tarik Naiwieng, 2026) kan khreh ba kan jam sa sha ka lympung ïalehkai ba khatduh ban pynkut ïa u snem 2026, ha kaba ki lahduh (champions) bad ki kynhun ba wan ba-ar (runners-up) jong baroh ki kyrdan (division), kin ïakhun ban ïaknieh ïa ka Champion Cup.
Ka jingïalehkai sdang kan long hapdeng ka Mawlai SC pyrshah ïa ka Lamlynti FC ha ka Group A. Ka jingïalehkai kan long ha SSA Stadium ha ka por 2:30 baje nohphai sngi.
Ka SSA ka la sdang ban pynïalehkai nyngkong ïa kane ka lympung ha u snem ba la dep (2025), ha kaba ka Nongkseh ka la rah ïa ka nam lahduh. Hynrei mynta u snem kan nym ïohlad ban ïada ïa ka nam lahduh namar kam shym la lah ban pyndep ha ka thup kyrdan Top 2 ha ka Shillong Premier League. Baroh ki kynhun ban ïashim bynta kidei kiba thymmai lait noh tang kawei; kata ka Shillong Lajong, ka ban ïakhun ha ka sien kaba ar lynter.
Ka Mawlai kadei ka lahduh jong ka SPL, hadien ba ka la jop ïa ka nam lahduh kaba lai khlem da shah rem. Hynrei, ki la khyllem noh ha ka Nongkseh ha ka semi final jong ka SSA Super Cup kaba bud. Watla katta ruh, ka Mawlai ka dang ïai long ka kynhun kaba khlaiñbor bad kaba don jingkyrmen ha kane ka Champions Cup katba ka dang ïakhun ban bynrap shuh ïa ki khusnam lahduh jong une u snem 2026.
Ha kawei pat ka liang ka Lamlynti, ka la wan ba-ar (runners-up) ha ka Third Division. Ka la pyndep ha khlieh duh ha ki jingïalehkai Group stage bad ha ka kyrdan ba ar ha ka wat ïakhun Super 8 hadien ka Sanmer. Nangta ka la pynliem ïa ka Umiew Maw U Sam lyngba ka penalty shootout shuwa ban shah rem noh ha ka Sanmer ha ka jingïakhun na ka bynta ka nam lahduh.
Ban kham itynnad ka jingïakhun, la shah ïa ki klob na ka Second, Third bad Fourth Division ba kin shim wai san ngut ki rangïalehkai na kiwei pat ki klob, katba ki kynhun na ka SPL bad First Division kin hap ban pyndonkam da kijuh ki rangïalehkai ba ki ladep kyntiew kyrteng bad ka SSA.
Da kaba bud katkum ki kyndon, ka Lamlynti ka la shim wai san ngut, kata u Lukas Syngkli (rangap dien) bad u Nister Suting (goalkeeper) jong ka Langsning, u Nikelson Bina (midfielder) ka Nangkiew Irat, u Shanborlang Nonglait (rangap dien) ka Laitkor bad u Shaitborlang Kharkrang, u ba dei u striker na ka Mylliem Lum.
