SHILLONG, Naiwieng 01: Ka Shillong Lajong FC ka la sdang ïa ka jingïalehkai ba nyngkong jong ka ha ka Indian Football League (IFL) 2026–27 da kaba jop 1–0 kol pyrshah ïa ka Mohammedan SC ha Kalyani Stadium ha ka sngi Saitjaiñ.
U Nelson Rymbai uba la mih kum u nongbujli ha ka kylla miet, u la kylla long u namtam jong kane ka jingïakhun, da kaba pynkhihjar ha ka minit ba khatduh (90’) ban pynthikna ïa ki 3 point na ka bynta ka Lajong ha kane ka jingïalehkai ban sdang ïa ka samoi ba thymmai.
Kane ka kol ka long kaba kyrpang na ka bynta u Nelson, uba la plie ïa ka jingkheiñ thep kol jong u na ka bynta ka klob da ka kol ba kongsan ha ka jingïalehkai ba nyngkong jong u ha ka IFL.
Wat hapdeng ka jingpyrshang kaba tyngeh na ka kynhun kaba ïalehkai hala ïing, ka Shillong Lajong ka la pyn-eh triang ban ïoh ïa ka jingjop shabar nala ïing bad ha kajuh ka por ban sdang ïa ka jingïalehkai IFL 2026-27 da kaba khur pura lai poiñ.
Kane ka jingjop ka dei ka jingsdang kaba bha na ka bynta u coach u Birendra Thapa bad ka kynhun jong u katba ka Lajong ka khmih lynti ban tei kham bha shuh ban ïa ka kynhun jong ka samoi ba ladep, kaba wan ba-ar ha ka league.
Ka Lajong kan wanphai biang sha ka Indian Football League da ka jingïakhun North-East Derby pyrshah ïa ka Chanmari FC, ha ka jingïalehkai ban long hala ïing ha SSA Stadium, Shillong ha ka 06 tarik Naiwieng. Kane ka jingïalehkai kan long ha ka por 6:30 baje janmiet.
