Ka Project ‘Mynried’ ka ba saiñdur da ka ophis DC-EJHD kan ïarap ïa ki longïing ba duna ka ïoh ka kot

Khliehriat Risaw 29: Ka Project ‘Mynried’ ka dei ka project ba la saiñdur da ka ophis u Deputy Commissioner ka East Jaiñtia Hills District bad ha ka ktien khasi ka Mynried ka mut Ka Lawei bad kane ka project ka dei halor ka jingthmu ban kyntiew bad ban iarap lem ïa ki briew khamtam ki khynnah kiba shong ba sah hapoh East Jaiñtia Hills District kiba na ki longïng kiba dunna ka ioh ka kot.
Kum ban shu phai dien, myn ha ka 17 tarik mynta u bnai risaw ha ka prokram Collection Drive ba la pynlong ha DC office Khliehriat ki la don 18 ngut ki nongtrei kiba trei ha ophis DC Khliehriat ki la mih shakhmat bad nohsyniang sha kane ka project da ki tiar bapher bapher bad kat haduh mynta ka 29 tarik ki la don haduh 46 ngut ki briew kiba la mih shakhmat bad ki la wan ban noh syniang sha kane ka project bad la ioh lum haduh 1100 ki jait tiar kum ki jaiñ phong, ki kot skul, ki tiar ialehkai ki khynnah bad kiwei kiwei ki jait tiar
Na ka liang u Deputy Commissioner ka East Jaiñtia Hills District u la ong ba kane ka jinglum, jinglang lane ka Collection Drive ka dei kawei ka synjam kaba la ai mynsiem ha kaba la ioh lum bun jait ki jingnoh syniang ba kynthup ki jaiñ phong, ki tiar ialehkai ki khynnah, ki kot pule, ki juti bad kiwei kiwei ki jait tiar kiba na ka bynta ki hep rit bad ïa kine ki tiar yn sa sam sha ki khynnah bad kane kan long ka lad ban pynsngewbha ïa ki hep rit, u kyntu ïa kiwei kiwei ki nongtrei sorkar bad ki riew paidbah ba kin wan shakhmat ban noh syniang da ki jaiñ phong jong ki khun ki bym pyndonkam shuh, ki kot skul kiba ym pyndonkam shuh ki khun bad kiwei kiwei ki jait tiar.
Lyngba kane ka Project Mynried, ki bor district kin pyrshang ban wad shuh shuh ïa ki briew kiba don ka mynsiem ban iarap, kiba sbun, kiba don ka mynsiem ban iatreilang ha ka imlang ka sahlang kiba kloi ban kner la ki kti ban noh syniang sha ki longiing kiba hapoh East Jaiñtia Hills District, kiba dang duna ha ka ioh ka kot.
Kane ka Project ka dei hapoh ka jingpeit jingkhmih u Deputy Commissioner, East Jaiñtia Hills District, u Manish Kumar, IAS bad la thung ruh ïa u Senior Assistant Commissioner uba dei ruh u ‘Project Head jong ka project Mynried, u bah F. Passah, MCS bad ki dkhot kiba na DC Ofice, la ong ruh ba ka ophis kan ai da ki syrnot lane ki Certificate of Appriciation sha kiba wan ban noh syniang.
Haba kren sha ki pathai khubor, u Manish Kumar, u la pynshai shuh shuh ba kane ka project kam dei na ka sorkar hynrei ka dei ka project ba la saiñdur da ma u hi kum u Deputy Commissioner ban iarap ïa ki longiing kiba duk bad ka dei ka project ka ban kyntiew ïa ka imlang ka sahlang bad ong ba ka la don ka jingwan shakhmat ki paidbah ban nohsyniang bad kyrmen bad kin sa nang don shuh shuh ki ban wan shakhmat ban nohsyniang, u kyntu ïa ki paidbah ka East Jaiñtia Hills District ba kin mih shakhmat namar kane ka dei ka kam kaba donburom ha ka imlang ka sahlang bad kan long ka jingkyrkhu ïa ki longiing kiba duk ba kyrduh bad lyngba kane ka project kan long ruh ka lad ban iarap ïa ki longiing longsem, ha kajuh ka por, u ai khublei sngewnguh ïa kito baroh kiba la wan ban nohsyniang sha kane ka Project.
Na ka liang u bah bah Juhhi Nanghuloo, uba dei u Project Coordinator jong ka Project Mynrried, u la ai ka jingkhublei ïa u Deputy Commissioner bad ong ba kane Project ka dei kaba u la dep iakren bad u DC, Manish Kumar bad dei da ka jingiatreilang bad u DC kumjuh ruh u Assistant Commissioner, u bah F.Pasah lem bad ki ADC la lah ban pynwandur ïa kane ka project bad kane ka Project ka don ruh ka jingbuhthong khamtam ban iarap ïa ki khynnah bad kane ka long ka jingkyrkhu ïa ki longiing kiba duk, u bah Juhhi u kyntu ïa kiwei kiwei ruh ba kin mih shakhmat ban nohsyniang sha kane ka Project bad khmihlynti ba lyngba kane kan wanrah ïa ka jingkylla ha ka imlang ka sahlang bad ruh u la aikhublei ïa baroh kito kiba la wan ban nohsyniang sha kane ka Project.