Ki mar rep, ki soh ki don ka dor lada nang kumno ban shna bad pynmih da kiwei ki jait jingbam

Banroi Syiem, Reporter, Ri Bhoi

Nongpoh, Risaw 28: Ka Farmer Social and Development Society jong ka shnong Shangbangla mynta ka sngi kala pynlong ïaka prokram ai jinghikai halor kumno ban pynïaid iew ïaki mar rep naduh ki soh ki jhur bad khamtam ban pynitynnad bad pynwandur da kaba shna ha kiwei kiwei pat ki jait jingbam khnang ba kan kyntiew ïaka ioh ka kot ki nongrep, kumba bun naki nongrep haka jylla kila sdang ban kiew shaphrang tang na ki mar rep jong ki.
Ha katei ka prokram la ai jinghikai ruh da uwei naki nongrep bala kiew shakhmat naka them Ri-Bhoi u Bah Midor Binong haka jingdonlang u Bah Mayral Born Syiem MLA ka Nongpoh, u Bah Viceroy L Mawnai Rangbah Shnong lem bad ki nongrep na katei ka shnong.
Lyngba kane ka prokram ka thong ka long ban kyntiew ïaki nongrep lyngba ki mar rep namar ka shnong Shangbangla kadei kawei naki shnong kaba pynmih bun u sohtrun bad kiwei kiwei ki mar rep kum u slatyrpad, u sohmrit, shynrai, cardamom bad kiwie kiwei de ki mar rep bad lyngba kane ka prokram ka long ka jinghikai ïaki nongrep kumno ba kin nang ban pynïaid iew ïaki mar rep jong ki ban pynheh ïaka dor jong kino kino ki jait mar rep.
U Bah Mayral Born Syiem kum u kongsan u la ong ba ka long kaba kongsan ba ki nongrep ki dei ban ioh ka jinghikai kumno ban pynioh dor ïaki mar rep ki jong ki, da kaba ai nuksa na kiwei kiwei ki jylla ba tang naka dud ki lah ban pynmih shibun ki jait jingbam bapher bapher bad ka dor kala ïapher shibun haba nujor bad ka dud kaba ngi dih shi kilo bad kane kan kyntiew ïaka dor jong kino kino ki jait mar rep lada ngi nang ban pynmih bad shna biang da kiwei ki rukom.
U bah Mayral Born u la ai mynsiem ruh ïaki nongrep ba kin nang trei shitom haka jingim jong ki bad khamtam ba ki mar rep jong ki bad ka kamai kajih jong ki kan nang kiew na uwei u snem sha uwei pat.