Pynshlur ka NPP Mylliem ïa ki samla kynthei bad shynrang ba leh bha ha ki eksam

Shillong, Risaw 25: Kumba ju long man la u snem, mynta ka kynti ruh kumjuh ka National People Party Mylliem Constituency kala pynlong ia ka 8th U Tirot Sing Syiem Academic Awared 2026, kum shibynta ban ithuh ia ka jingjop jong ki khynnah pule kiba la leh bha ha ka jingpule ka jong ki.
Ïa kane ka jingpynkup burom kaba la tip kum ka 8th U Tirot Sing Syiem Academic Awared 2026 la pynlong ha madan football jong ka shnong Nongumlong.
Ha kane ka sngi baroh ki khynnah kiba la shah pynkup burom ki don haduh 107 ngut tam bakynthut ïa ki khynnah kiba la pass bha ha ki kyrdan bapher bapher, kumjuh ki Phd bad ruh kito kiba la nam bad burom ha ka jingialehkai bapher bapher.
Ha kane kasngi kaba dei ka sngi ba ki khun ki kti kila ioh ia ka jingithuh ba kyrpang hadien ka jinglah jong ki ban leh bha ha ki eksamin, la synran lang da ki kmie ki kpa jong ki khun kiba ioh pdiang ia ka khusnam na ka NPP Mylliem Constituency.
U MLA ka Sohra uba dei ruh u Chairman jong ka MIDC u Bah Gavim Mylliem u la shim ia ka bynta kum u kongsan katba u Bah Hamletson Dohling kum u Symbud Kongsan ha ka jingsakhi lang jong kiwei pat kiba shah khot sngewbha kum u Bah HM Shangpliang, ki Rangbah Shnong nalor kiwei pat.
Haba kren ha ka jingialang u Bah Hamletson Dohling u la ai khublei ia ki Rangbah shnong Nongumlong kiba la ai ka jingiatrei lang ban pynlong ia ka program kaba jop bad kumjuh ruh ia ka kynhun jong ka NPP Mylliem bad u la pyntip ha la shem snem un wah hi u Myntri Rangbah ban pynkup burom ia ki pass bha.
Na ka liang jong nga, nga dap da ka jingsngewkmen eh ban ioh biang kane ka lad ban iasam bad phi ki khun samla jong ka consyituency bad nga shu kwah ban iathuh ha phi hangne namar ba ha por ba ngi dang leit skul ym ju don kiba ithuh bad pynkup burom ia ngi bad kala kut shu bam cake ha iing.
“Phi ki khun samla phi long kiba donbok ba phi ioh ka jingithuh ka jingpynshlur bad ka jingai mynsiem, kiba bun ki lah ban kylli balei kum kine ki award ki donkam kumne bad ia kane ka jingsam award la sdang nyngkong da ka KSU ha u snem 1993-94” ong u Bah Hamlet.
Mynshwa ym ju poi pyrkhat, hynrei lyngba ka seng ki samla pule kaba la shim ia kane ban pynshlur ia ki samla la ka long haka pule dangle ne ka sport ne ha kano kano ka kam bad ha u snem 2006 ka sorkar ba la ialam da u Dr Mukul Sangma kala sdang ban bud ïa kane ka sienjam, u la ong.
Kane ka sorkar ruh kam shym la klet da kaba ai laptop ïa ki khynnah kiba wan sha khmat, mynta kane ka sorlar ruh kam shym la klet ki khynnah kiba ioh ha ka top position ki ioh ka laptop bad mynta ki khynnah kiba leit klass XI ki ioh ïa ka tablet kaba dei ka jingithuh jong ka sorkar.
Shuh shuh u Bah Ham u la ong ba kane ka prokram la ioh ka jingmynjur na ka sorkar, na u Chief Minister bad Deputy Chief Minister bad u Conrad u la ong ba la shem snem un sa wan hi ban sam ia ki award sha ki khynnah kiba pass bha bad kane kan long ka khubor na ka bynta kito ki khynnah kiba shong klass X ba kin leh bha ha ki eksamin namar ba phin sa ioh na kti u Chief Minister namar ba u la kular.
Na ka liang u kongsan u Bah Gavin Mylliem u la ai khublei ia barob ki khun samla kiba la shah pynkup burom bad kmen ban don lang ha kane ka program kaba plie lad plie lynti ban pynshlur ba phin dang kiew bad kiwei ruh ba kin poi sha ka thong ha ki snem ban wan bad u la pynpaw ia ki khun samla ba ngi im ha kajuk jong ka jingiakhun kumtangi deiban long khuid bad leh shitom bad lait na ki jingpynshoi bad ki jingsniew.
Shuh shuh u Bah Gavin u la ai ka jingiaroh ia u Bah Ham uba la lah ban pynlong ia kum kane ka jingsam khusnam kaba 8 sien kynthih ban pynslhur ia ki khun samla jong ka dong ka thain ban kyntiew ia ka pule puthi hapoh ka Constituency hi baroh kawei.