Nga kwah ba na Mylliem kin mih bun ki Sahep IAS bad IPS bad wat lapmiet ban kdew kti: Hamlet

Shillong, Risaw 25: U MLA barim jong ka Mylliem Constituency uba dei ruh u working president jong ka National People Party (NPP) u Bah Hamletson Dohling u la ong ba shi sien ka sngi kin mih bun bah ki IAS bad ki IPS ophisar na Mylliem Constituency.
Ïa kane u Bah Hamlet u la pynpaw ha ka jingialang pynkup burom ïa ki khynnah kiba la pass bha ïa kaba la tip kum ka 8th U Tirot Sing Syiem Academic Award 2026 ïa kaba la pynlong hapoh ka shnong Nongumlong.
Haba kren u la ong, “haba peit mynta hapoh ka secretariat la duna ki IAS Khasi ki jong ngi bad u snem ba khatduh ba ioh IAS ophisar kadei ha u snem 2012, shano ka jaitbynriew kan poi lada ngim buh ïa ka jingpule ha khmat eh”.
“Kam dei te ïa ngi ban shu ia kdew kti, oohh ta u ophisar na Karnataka, na Taminnadu bad na Delhi……..ban kdew kti te ka suk, hynrei mynta ngan ong kein noh ka ïa kdew kti ngin pynshlur ïa ki khun jong ngi ba kin minot ha ka jingpule a kin leh ïa ki eksamin Civil Service” u la ong.
Shuh shuh u la ong, “Da kumne ngi kyrmen ba bun ki samla jong ngi kiba lah ban leh, kynmaw haba u Blei u thaw ïa u briew ha ka pyrthei u thaw kumjuh bad u ai ka jingmut jingpyrkhat bad ka jingbieng kumjuh bad baroh ka shong ha ngi ki briew kumno ban pyndonkam”.
U Bah Ham u la ong, “Nga khot na na ka bynta ki khun samla, ka por jong phi ka dang bun bha katba dang don ka aiom ksiar ka aiom rupa pyndonkam hok ia ka por ka jong phi namar ba wei ba la duh ym lah shuh bad lada lah iaid ka snem sha khmat ban babe kam don jingmut shuh”.
Haba ai mynsiem ïa ki Samla u Bah Ham u la ong ïaid sha khmat ha kino kino ki kam ba phi trei namar ba lada phi trei da ka jingtip briew tip blei baroh ka kam ka long beit kaba lah.