Mawkyrwat, Risaw 25: Ka seng kaba peit ïa ka jingbha ban pynneh pynsah ïa ki dohum dohwah hapoh ka thaiñ Ranikor baroh kawei, ka Synjuk Nongkhwai Dohkha Ranikor Civil Sub Division (SNDRCSD) ha ka 17 tarik u Risaw, 2026 ka la la ïoh ban kem ïa ki arngut ki briew katba ki dang pynhap jar ha wah Rilang, South West Khasi Hills District.
Ïa kine ki briew la ïoh ban kem da ki dkhot ka Synjuk Nongkhwai Dohkha Ranikor Civil Sub Division Nongnah Unit bad hadien kata ka seng ka la ïoh ban khot ban bishar ïa kine ki ar ngut ha ka 24 tarik u Risaw, 2026 ha Nongnah, na ka liang jong kine ki ar ngut ki la kular ba kin ym mlien shuh ban leh kum kine ki jait kam bad nangne shakhmat kin ai ka jingïatreilang bad ka seng.
Ïa kine ki ar ngut hadien ba la dep ban bishar bad ai jingsneng la pyllait noh ïa ki.
U Bah Micheal Donal Lyngdoh, President Synjuk Nongkhwai Dohkha Ranikor Civil Sub – Division Nongnah Unit haba kren sha ki lad pathai khubor u la ong ba ka synjuk kan dang ïai trei bad khynra ïa ki runar kiba ju mlien ban dusmon ïa ki dohum dohwah ha ka thaiñ Ranikor baroh kawei .
Ha kajuh ka por, ula maham jur ruh ïa ki runar kiba ju mlien ban pynïap beiñ ïa ki dohum dohwah da kaba kawang bom, pynhap jar bad ai awai bih ba lada lap ka synjuk kan pynshitom da kaba tyngeh ryngat ka kuna bad kin aiti ruh ha ki bor ka aiñ khnang ba kin leh ïa kaba donkam.
