Nongpoh, Risaw 19: Ka jinglehniam Durga Puja ha sor Nongpoh da ki ar tylli ki Mandir ba kynthup ïaka Nongpoh Ram Mandir Durga Puja Samity bad ka Shree Shree Maa kali Mandir kala long kaba phuh ba phieng da ki rong ki rup bad ki jingpynriam bapher bapher lyngba ki Puja Pandal ba kila shna haki rukom ba itynnad bala shimbynta da ki paid riewngeit Hindu ban mane shuwa ba kin leit pynngam ïaki Blei haka 21 tarik mynta u bnai.
Haba kren bad ki nongthoh khubor naka liang u Muneshwar Singh Secretary Nongpoh Ram Mandir Puja Samity u pynpaw ka jingsngewkmen ba ka jinglehniam Puja ha Nongpoh kala long kaba ïaid beit ïaid ryntih khlem kano kano ka jingshah pynthud bad ka Ram Mandir ha Nongpoh ka la sdang ban rakhe ïa ka jinglehniam puja naduh u snem 1944 bad la tei ïa katei ka Mandir naduh u snem 1927.
U la ong ruh ba ki paid riewngeit Hindu na kylleng ka sor Nongpoh kila wan ban mane bad lehniam ha katei ka jaka bad kum ka komiti kala ïatreilang ruh bad ki bor district ban bud ryntih ïaki kyndon ka NGT haba ïadei bad ki jingthud bad ki jingjaboh kiba lah ban mih na kane ka jingrakhe Puja naduh ki rong ki rup khamtam haka sngi pynngam ïaki Blei bad ruh ka ban pynduna ki jingpynsawa bad pynkut haka por kaba biang.
U la ong ruh ba kane ka jinglehniam Puja ka long kaba suk ba saiñ naduh bala sdang ïaka, kumba kane ka jinglehñiam ka long ka jingjop ryngkat ka jinduwai ba baroh ki paid riew ngeit Hindu kin lehkmen da kaba suk ba saiñ bad lait naki jingpang jingshitom ryngkat ka jingkyrkhu ba ka Ri-Bhoi, ka jylla bad ka ri baroh kawei kin dang kiew shakhmat bad shakhmat ha baroh ki liang bad ïa kane ka jinglehkmen Puja yn pynkut noh haka 21 tarik mynta u bnai kaba dei ka sngi bret blei ha wah Umtrew ha Byrnihat.
Naka liang ki komiti jong baroh ar tylli ki Mandir ki ai khublei ruh naduh ki bor synshar shnong, ki bor District, ka tnad Pulit bad baroh kiba la don bynta ha kaba kyrshan ïa kane ka jinglehniam Puja kaba suk ba saiñ bad kaba kmen.
