Nongstoiñ, Risaw 19: Ha ka shiteng sngi jong ka sngi nyngkong kaba dei 19 tarik Risaw 2026, iwei I heprit kynthei I ba dang 8 snem ka karta I la duh noh ïa la ka jingim, hadien ba I la shah tynrah ha kawei ka trok kaba don ïa u Registration Number ML 07 B 1437 katba I dang pyrshang ban mareh na shilliang sha shilliang jong ka surok.
Ki tyllong khubor ki ïathuh ba kane ka jingjia ka la jia ha ka por kumba 1 baje nohphai sngi ha ka surok bah Nongstoiñ-Maweit kaba dang hap ruh hapoh u pud u sam jong ka shnong Risiang.
Na ka liang u Bah Pynshai Kharbani Secretary ka shnong Risiang, u la ong ba I tei I heprit ba la khlad noh la tip kyrteng kum I Anisha Thyrniang, phra snem ka karta khun jong ka Shaidalin Thyrniang bad u Bah Denis Mawdoh kiba napoh ka Shnong Risiang West Khasi Hills.
U la ong ruh ba na ka liang jong ka shnong mar mar hadien ka jingjia, ka la pyntip kloi lan sha ki pulit ha kaba na ka liang jong ki pulit ruh ki la poi sha katei ka jaka ban leh ïa kaba donkam katkum ka aiñ.
