Shillong, Risaw 19: Ka sienjam kaba ar jong ka SSA Super Cup ka la poi sha kaba kut ha kaba ka Nongkseh ka la ïohrah ïa ka nam lahduh hadien ba ka la pynliem noh ïa ka Meghalaya Police Football Team da 3-0 kol ha ka jingïakhun phainal hynne ka janmiet sngi Nyngkong ha SSA Stadium.
Ka Nongkseh ka la ïoh ban lamkhmat na ka kol ba la kum thep hi da u rangïalehkai ka liang pyrshah ha ka minit kaba 8 shuwa ba u Dawanchwa Challam un pynjlan ar shah ïa ka kol lamkhmat ha ka minit kaba 78, bud sa ka kol na u kapten u Hardy Cliff Nongbri uba la pynthikna ïa ka jingjop da kaba thep ïa ka kol ba lai ha ka minit kaba 86.
Kumba la khmihlynti, ka SSA Stadium ka la dap smam da ki paid nongkyrshan, bad ka jingïakhun kam shym la slem ban wanrah ïa ka kol, kaba la urlong tang hadien katto katne minit ba la sdang ka jingïalehkai. Kane ka kol ka la jia hadien ba u Chesterpaul Lyngdoh u la pashat ïa ka bol kaba ula thmu ban pynrung hapoh box na ka bynta u Kitboklang Pale, hynrei ka bol ka la leit tyngkhuh ïa u rangïalehkai ka MLP u Wanteilang Kharkongor bad ka la rung beit beit sha kol.
Tang mar ïathep ka Nongkseh ka la shah ñion, ha kaba ka MLP ka la ïoh ba kan pyrshang katto katne ki kabu ksiar sha kol ha ka kylla step, kynthup ïa ka jingpyrshang kaba jam na u Chesterfield Nongdhar ha ka minit kaba 19 hynrei ka bol ka la leit dei ïa u dieng kol, nangta ka bol pashat ba thikna da u Bisharlang Kharumnuid ha ka minit kaba 36 ka la shu sepei hadien ba u Aldrin Ramsiej um shym la lah ban pyndep ïa ka kamram.
Ka Nongkseh ka la khie im biang ha kaba sdang jong ka kylla miet, ha kaba u Shano Tariang u la jan ïoh thep tang mar ïa mih madan, hynrei ka jingpyrshang jong u ka la lait sharud.
Hadien 20 minit u Hamedamanbha Wahlang u la pashat ïa ka bol kaba thikna na ka bynta u Shano hynrei u nongap kol ka MLP u Eveningstar Bareh u la mareh pynstet bad khanglad ïa ka jingpyrshang.
U Shano u la don bynta ban plie lad ïa ka kynhun ban thep ïa ka kol kaba ar da kaba rah ïa ka bol sha liang kadiang shuwa ban kynting tiak ïa ka bol sha u Dawanchwa, uba la pyndep ïa ka kamram ban pynkhihjar.
Kane ka kol ka la pynjemkhnap ïa ka MLP hynrei u Hardy u la pynthikna shi syndon ïa ka jingjop da kaba pynkhihjar ha ki minit ba khatduh.
La wan ban sakhi ïa kane ka jingïakhun phainal da u Myntri ka tnad Sports jong ka Sorkar Meghalaya bah Wailadmiki Shylla, ha ka jingïadon lang u Chief Secretary ba la shongthait u bah Donald P Wahlang, ka Director General of Police kong Idashisha Nongrang, u President ka Meghalaya Football Association bah Hamletson Dohling, General Secretary ka MFA bah Sunesh Syiem bad ki dkhot ba la rangbah jong ka SSA ba la lamkhmat da u President bah Banteidor Lyngdoh MLA.
Ha ka jingïalang sam khusnam, ïa ka T7 Player of the Final la ïoh khur da u Chesterpaul Lyngdoh jong ka Nongkseh. Ka Nongkseh kum ka lahduh ka la ïohpdiang ïa ka khusnam pisa kaba Rs 2 lak, katba ka MLP kaba wan ba-ar (runners-up) ka la khur ïa ka song pisa kaba Rs 1 lak.
Hadien ka Super Cup kin dang don shuh ki lympung phutbol ban pynkut ïa u snem 2026, ha kaba ka sienjam kaba ar jong ka SSA Champions Cup kan khreh ban sdang ha u bnai Naiwieng, ha kaba kane ka lympung kan wanrah lang hajuh ïa ki lahduh bad ki kynhun ba wan ba ar (champions & runners-up) jong baroh 5 tylli ki lympung phutbol ka SSA ha kawei ka lympung.
