Mawkyrwat, Risaw 13: Ka Monlang Multipurpose Co-operative Society jong ka shnong Weiloi, ha ka jingïatreilang bad ka Dorbar Shnong, mynta ka sngi ka la plie paidbah ïa ki jaka jngohkai pyrthei kiba don hapoh ka shnong Weiloi, East Khasi Hills District, kynthup ïa ki kshaid bad ki jaka peitkai kiba itynnad.
Ki jaka jngohkai kiba la ïoh ban plie paidbah mynta ka sngi ki kynthup ïa ki kshaid kiba itynnad kiba kynthup ïa ka Kshaid Sah-shrieh, ka Kshaid Ksah-masi, ka Kshaid ‘wei-kohblak bad nalor kine ki kshaid ki don ruh sa ki jaka jngohkai ne ki Viewpoint kiba itynnad kiba kyrteng u Dom-seinar, u Dom-spit, bad u Langkohpia, u Lum Kulai bad halor jong une u lum ki don ki krem Dom-khang-ïing bad kiwei kiwei de.
Ha kane ka sngi, u Bah Alvin Sawkmie, MDC jong ka Mawsynram Constituency, u la long kum u Kongsan, katba u Bah H.M. Shangpliang, Adviser jong ka Sorkar Jylla, u la long kum u Symbud Kongsan. La sakhi lang ruh ïa kane ka sngi da u Rangbah Shnong Weiloi bad kiwei kiwei ki riew rangbah jong ka shnong.
U Bah Alvin Sawkmie haba kren ha ka jingïalang, u la ai jingïaroh ïa ka Monlang Multipurpose Co-operative Society bad ka shnong Weiloi baroh kawei kiba la shim ïa ka sienjam ban kyntiew ïa ki kam jngohkai pyrthei ka ban long ka jingkyrkhu ïa ka shnong baroh kawei. U la pynpaw ïa ka jingkmen bad ka jingsngewphylla ban lap ba ka shnong Weiloi ka don ïa ki kshaid kiba itynnad bad ki jaka peitkai kiba itynnad bha.
Kumta, ula kyntu bad ai mynsiem ruh ïa ka Society ba kan shim ïa ki lad ki kabu ban pan jingïarap na ka Sorkar Jylla lyngba ka tnat Tourism Department, khnang ban lah ban pynbha shuh shuh ïa ki jaka jngohkai pyrthei bad ban pynlong ïa ki kiba khring shuh shuh ïa ki nongwan jngohkai na kylleng ki jaka.
Ha kajuh ka por ula pynpaw ba ka Sorkar Jylla ka ai ka jingkyrshan ïa ki kam jngohkai pyrthei kum kawei na ki lad ban kyntiew ïa ka ïoh ka kot bad ban thaw ïa ki lad kamai kajih bad ki lad ïoh kam ïoh jam ïa ki paidbah. Kumta, u la pynshlur ïa ka shnong Weiloi bad ka Monlang Multipurpose Co-operative Society ba kin nang ïai bteng ban ai ka jingïatreilang ban kyntiew ïa kane ka kam, kaba lah ban wanrah ïa ka jingmyntoi ïa ki nongshong shnong bad ïa ka jylla hi baroh kawei.
