Ïashimbynta ki skul ha SWKH ha ka Mass Casual Leave ba 3 sngi ka KJDSTA bad ka GHDSTEA

Mawkyrwat, Risaw 13: Ka Khasi Jaiñtia Deficit School Teachers’ Association (KJDSTA) bad ka Garo Hills Deficit School Teachers and Employees Association (GHDSTEA) ki la pynbna ban pynlong ïa ka jingiakhih lyngba ka Mass Casual Leave ka ban neh lai sngi lynter, naduh ka 13 haduh ka 15 tarik u Risaw, 2026, kum ka dak jong ka jingpyrshah ïa ka jingbym pat pynurlong jong ka Sorkar ïa ki jingdawa jong ki kiba dang sah.
Ha kine ki lai sngi jong ka jingiakhih, la sakhi ba ki skul ha South West Khasi Hills District, East Khasi Hills District, Ri-Bhoi District, West Jaiñtia Hills District bad ha kiwei pat ki bynta jong ka Garo Hills ki la shah ktah namar ka jingbym wan trei jong ki nonghikai bad kiwei ki nongtrei skul. Kane ka la pynlong ïa ki khynnah skul kiba wan sha skul ban sah khlem da ïoh ïa ki jinghikai kiba ki dei ban ïoh, namar ka jingbym don jong ki nonghikai ha ki klas.
Haba ïakren bad ki Headmaster, Headmistress bad ki Head Teacher jong ki skul ha South West Khasi Hills District, ki la pynpaw ïa ka jingsngewkhia bad ki jingeh kiba ki mad na kane ka jinglong jingman. Ki la ïathuh ba watla ki nonghikai kim wan, ki hap ban shim ïa ka jingkitkhlieh ban plie ïa ki skul bad pdiang ïa ki khynnah pule, namar kim lah ban pynbna shuti tang namar ka jingbym don jong ki nonghikai.
“Ka long kaba eh ïa ngi ban pynlong ïa ki klas namar ki nonghikai kim wan trei. Wat lada ngi kwah ban hikai, hynrei tang marwei ne ar ngut ngim lah ban rung sha saw ne san tylli ki klas bad ai jinghikai ha kajuh ka por,” la pynpaw ki Headmaster, Headmistress bad ki Head Teacher jong ki skul hapoh South West Khasi Hills District.
Namarkata, ki la kyntu ïa ka Sorkar ba kan shimkhia mardor ïa kane ka bynta bad ban leh ïa kaba donkam ban pynbeit ïa ki jingdawa jong ki nonghikai kiba dang sah khnang ba ka pule puthi hapoh ka jylla kan nang kiew. Ki la pynpaw ïa ka jingsngewkhia ba lada kane ka jinglong jingman ka dang bteng, ki khynnah skul kin sa shah ktah nyngkong eh, namar watla ki wan sha skul man ka sngi, da kaba khmih lynti ban ïoh jinghikai kiba biang hynrei ki khlem ïoh.
Ki la pynpaw ruh ba lada kane ka jingsangeh shim klas kan bteng, kan long ka jingban khia shuh shuh namar ba ka por eksam jong ki khynnah skul ka la jan, bad ka jingduh ïa ki sngi hikai ka lah ban ktah ïa ka jingpynkhreh jong ki khynnah skul ba ki ap khmih lynti ban ïoh ïa u soh jingjop hadien ka eksam.