Ha ki khyndiat sngi yn hiar ka KSU sha madan ban khmih ne peit la ka aiñ tehlakam nongbylla ka treikam ne em

Shillong, Risaw 12: Ka KSU Central Body hapoh ka jingïalam jong u Environmental Secretary u Samla Shiningstar Kharbihkhiew ki la leit ban ïakynduh ïa u Commissioner jong ka tnat Labour ban buddien ïa ki 5 tylli ki mat jingdawa kiba la seng ka la dep ban pynpaw.
Napdeng kine ki mat kawei ka dei halor ka kam bylla ha kaba ka KSU ka la leit ban kynduh ha ka sngi Nyngkong ban tip haduh katno kane ka kam ka la ïaid shakhmat.
Haba kren sha ki lad pathai khubor u Samla Kharbihkhiew u la ong ba kane ka jingïakynduh ka long halor ki 5 tylli ki mat kiba ka seng ka la buh hakhmat ka sorkar bad kawei napdeng kine ki 5 tylli ki mat ki dei ka Identification of Immigrant Workmen Act, 2020 bad ha kine ki bnai ba la dep ka seng ka la ïakynduh bad u Myntri Rangbah ka jylla bad hadien pat la ïoh ban ïakren bad u Chief Secretary ka jylla.
U la ong, “Ka thong hi jong ka seng ka long ba kane ka aiñ ka dei ban treikam ha kane ka jylla bad hadien ba la dep ban ïakren bad ki heh jong ka sorkar naduh u Myntri Rangbah ka jylla u Conrad K Sangma bad ba la kular ban pyntreikam noh ïa kane ka aiñ bad mynta ka sngi ngi kwah ban buddien ba haduh katno kata ka jingïakular ba ka seng ban pyntreikam ïa kane ka aiñ ka la long ne la pynïaid shakhmat,”
U la ong ba ha kane ka jingïakynduh bad u Labour Commissioner ka la long kaba sngewtynnad naba u la pyntip sha ka seng ba ka tnat kaba dei ban shimkhia ka la pyntreikam ïa kane ka aiñ bad la ïohi ba ha kine ki bnai ba la dep ka la khot ïa kata ka Orientation Prokram na ka bynta ki ophisar bapher jong ki tnat ban sngewthuh ïa ki shaphang ka jingpyntreikam ïa kane ka aiñ bad ka seng kan sa ïoh ka jingpynbna kaba dei na ka tnat.
“Ngi na ka liang ka seng ngi kwah ban pynshai sha ki kontraktor ne ki nongai kam ai jam ïa ki briew kiba nabar ka jylla naba ha kine ki bnai ba la dep ka seng ka la lap ba ki bar jylla ki la ïoh tang ïa ka Acknowledgement slip ruh ki la ïoh ban trei sha ki jaka bapher bapher kumta ka seng ka kwah ban pynsngew sha ki kontraktor ba nangne shakhmat ka seng lada ka hiar sha madan lada ka lap ïa uno uno u kontraktor ne u nongbylla bar jylla uba don tang ïa ka intimation slip ne ka Acknowledgement slip ka seng kan beh beit ïa ki,” u la ong.
U la pynpaw ba u kontraktor u dei ban ïoh ïa ka Provisional Certificate hapoh ka 30 sngi na ka bynta ki nongtrei kiba la wanrah nabar jylla bad hadien ka 30 sngi kidei ban ïoh ïa ka original certificate kaba dei na ka bynta ka 179 sngi ba kin shong ne sah bad bylla bad na ka liang ka seng kan sa bthah ïa ki shnat treikam jong ka seng ba ha kine ki 2 sngi 3 sngi kin sa hap ban hiar sha madan ban peit la kane ka aiñ ka la treikam ne em shisha hapoh khyndew ne ka shu long tang ki jingkular ki jingïakren ne tang ha ki kot ki sla.