Ym shai ki rukom treikam ka MUDA halor ki jingpynïaid ïa ki paiñkhana paidbah bad ki jaka ïeng kali: KHNAM

Shillong, Risaw 12: Ka Khun Hynñiewtrep National Awakening Movement (KHNAM) ha ka sngi Nyngkong ka la kynnoh ïa ka jingbym don ka rukom treikam kaba shai ha ka jingpynïaid ïa ki paiñkhana paidbah bad ki jaka pynïeng kali hapoh ka Meghalaya Urban Development Authority (MUDA) bad ka la dawa ban shim mardor ïa ki lynti ban pynbeit halor kane ka jingeh.
Halor kane ha ka dorkhas ba la phah sha u Chairman/Secretary ka MUDA, u Working President ka KHNAM u Bah Thomas Passah ula ong ba ki jingshem lyngba ka RTI ki pynpaw ba ki tender na ka bynta ki lai tylli ki paiñkhana paidbah ym shym la plie wat hadien shisngi ba pynlait ïa ka NIT.
U la ong, “Ka Notice Inviting Tender ban pynïaid ïa ki lai tylli ki paiñkhana paidbah ba don ha Pahsyntiew Shopping Complex & Parking Lot, Khlieh Iewduh Parking Lot & Khyndailad Ryntieh Police Bazaar Shopping Complex cum Parking Lot la pynmih da ka Tnad la jan shisnem, ki nongthep tender kila aiti ïa ki kot ki sla tender, hynrei ïa kine ym shym la plie satia haduh mynta bad ïa kine ki paiñkhana la pynïaid hi da ka Tnad.”
U Bah Passah u la ong ba ki nongthep tender kila pynlut pisa ban thied ïa ki court fee stamp bad ki kot tender hynrei ïa ki tender ym shym la plie satia, katba ïa ki paiñkhana la pynïaid da ki briew ki bym dei ki nongtrei ka MUDA, kaba pynmih ïa ka jingartatien halor ka jingtreikam kaba shai.
Shuh shuh katkum ka dorkhas ka la ong, “La pyntip ba ka dor ba la oh da ki briew kiba pynïaid ïa kine ki paiñkhana ka long palat ban ïa ka dor ba la buh da ka MUDA, kaba ïasyriem kum ka jinglum pisa jubor.”
Ha kaba ïadei bad ki parking lot, ka KHNAM ka la buh jingkylli ïa ka jingai wai ïa ka Garikhana Parking sha ka Kong Heevalina Kharraswai bad kdew ïa ka clause 4 jong ka kyndon ai kam kaba ong, “Ki nongthong ba heh dor eh ki lah ban nym dei eh kiba jop ha ka jingïathong. Ha ki kam bym ju jia koit ïa kiba thong heh yn ym pdiang satia hynrei yn pyrkhat tang ïa ki tender kiba kham bha bad ba don jingkitkhlieh.”
U Bah Passah u la ong, “Ka rukom ai pynïaid ïa ki Parking lot paidbah ha kylleng ka Ri, ka ju long beit ïa kiba thep heh dor duh hadien ba ki la pyndep ïa ka jingbishar technical.”
Na ka liang jong u, u la dawa ban ai ïa ka kam sha ki nongthong kiba heh dor duh hapoh ki kyndon aiñ kiba pyrkhing.
Shuh shuh ka KHNAM ka la kynnoh ruh ba ki artylli ki parking lot ha Khlieh Iewduh bad Khyndailad la pynïaid hi da ka Tnad halor ka nongrim ba dang ïaid ka jingtei pynbha.
“Watla lada don ka jingtei pynbha ïa kano kano ka parking lot, kam ym long satia kaba eh ban kheiñ ïa ka jingngiam jong ki kali. Nalor kane, u nongïohkam u hap shim ïa ka jingkitkhlieh ban leit khmih ïa ki jaka pynïeng kali bad kheiñ jingkheiñ hi ïa ka dor ba u tyrwa,” bynrap u nongïalam ka KHNAM.
Ka KHNAM ka la ai jingmut ba ïa ka NIT dei ban pynmih bad ïa ka contract dei ban ai lyngba ka jingkhot tender kaba shai, ka ban long ruh ka jingaikam aijam ïa ki samla ha kane ka juk bad ka por kaba kyrduh kam.