Kular u Symbud Myntri Rangbah ban ïatreilang bad ki bor pynïaid ka jaka pule

Jowai, Risaw 09: Shi bynta na ka jingrakhe dap 25 snem ne ka ‘Silver Jubilee Celebration’ (2001-2026) Ka Jowai Polytechnic mynta ka sngi 9 tarik u Risaw, 2026 kala pynkut ïa ka bynta jong ka ‘Institute Week 2026 Day-5 haka jingïalang ba la pynlong ha Auditorium jong katei hi ka jaka pule bad ïa kane ka jingrakhe yn pynhap pyrda noh ha u snem ban wan 2027.
Ha kane ka sngi u Symbud Myntri rangbah ka sorkar jylla u ma Sniawbhalang Dhar ula long kum u kongsan, haka jingdonlang ka symbud kongsan kong Linza F. Syiem ka District Sports Officer WJHD, u ma P. Lhuid u Executive Engineer ka PWD Building, nalor ki nonghikai bad ki samla pule.
Haba ai jingkren u ma Sniawbhalang Dhar ula ïaroh ïa kane ka jaka pule ‘Jowai Polytechnic’ kaba la jam sha u mawmer ba 25 snem ka jingshakri haka jingnang jingstad, ula kular ban ïatreilang na ka bynta ki jingdonkam ba hakhmat ka Jowai Polytechnic ha ryngkat ka jingïakren bad ki bor pynïaid jong kane ka Polytechnic. Ula kyntu ïa ki samla pule ban kin pynleit jingmut bha ha ki jingpule da kaba treishitom khnang ban ïoh kheit ïa u soh ka jingjop haka jingim, ula ong wat nym kheiñ ha kano ka jaka pule ba phi don, hynrei ka jingminot nalade hi kan kyntiew ïa ka lawei ba phyrnai.
Shuh shuh ula kyntu ‘wat sangeh ïaka jingpule bteng beit haduh ban da jop ïa ki kyrdan bapher bapher’ khnang ban ïoh ïakhun ïa ki kam sorkar, ki kam sengkam sengjam bad wat ban long kum ki nongïalam ha ka sain hima sima.
Kum u symbud myntri rangbah ula pynsngew halor ka jingim jong u da kaba ong ‘naka kam Business ula poi sha ka kam saiñ hima sima ban shakri ïa ka jylla’, ula pynsngew halor ki kam pynroi kiba ka sorkar MDA kala trei, ha kaba wat na ka liang ki myntri jong ka sorkar kmie kila ai ka jingïaroh da kaba pynsngew ba kin nang theh shuh shuh ïa ki skim pynroi shapoh ka jylla Meghalaya.
Kum u nongmihkhmat jong ka Ri-Lum Jaiñtia ha ka jingwan ïuhkjat jong u ha Kiang Nangbah College ha u snem bala dep, ula sngew donkam ban pynkylla dur ïa katei ka College da kaba mang pisa haduh 1 klur tyngka ban pynshan ïa ki jaka ïaid kjat, ka Parking na ka bynta ki ar shaka bad ki rong ki rup.
La pynphuh pynphieng shuh shuh ïa kane ka sngi da ki jingrwai bad ki jingshad tynrai na ki samla pule jong ka Jowai Polytechnic bad ka jingsam ïa ki khusnam sha ki nongjop ha ki jingïakop bapher bapher. Katba ha ka por janmiet ka la don ka Mr & Miss Polytechnic bad kiwei kiwei.