Pynlong ka kompani Amrit Cement Ltd ïa ka 23rd North-Eastern Metalliferous Mine Safety Week 2026

Khliehriat Risaw 7 : Ka Company dewbilat, ka Amrit Cement Ltd kaba don ha Umlaper, East Jaiñtia Hills District, mynta ka sngi ka pynlong ïa ka prokram kaba ïadei bad ka jingshngaiñ ki nongtrei ha ka jingtih mawshun ha ki par, ka 23rd North-Eastern Metalliferous Mine Safety Week 2026, ha kane ka sngi u heh sorkar uba dei u Deputy Director of Mines Safety, Guwahati, u Prem Kumar u la long u kongsan bad u la plie ïa ka prokram da kaba pynher ïa ka lama jong ka Amrit Cement Ltd bad ki nongtrei jong ka Amrit Cement ki la pdiang burom ïa u ha kane ka sngi.
Ka phang pdeng jong kane jingrakhe ka kren shaphang ka rukom trei ha ki par mawshun kaba da ki kor ki bor lane ka “ Use of Information Technology for Safty in Mines”
Haba kren ha ka jingialang, u Prem Kumar u la ai ka jingkbulei ïa ka company Amrit kaba la pynlong ïa kane ka prokram kaba phuh ba phieng bad ong ruh ba kane ka dei kum kawei na ki jingai jingpynshai ne ka awareness sha baroh ki nongtrei kiba trei ha ki par mawshun ba kin don bad kin ïoh ïa ka jingshngaiñ haba ki trei ha ki par, u kyntu ïa ki ba ki dei ban da bud ryntih bha ïa ki kyndon jingiada kiba katkum ka SOP, ki guidelines ban da phong ïa ki juti , phong ïa ki jingda khlieh ne helmet, ki ear plug, ki mask bad kiwei kiwei ki lad jingiada, shuh shuh u la kyntu ïa ki nongtrei kiba trei ha ki par ba ki dei ban da peit bha ba ym dei ban shah ïa ki kurim, ïa ki khun ki kti, ïa kiba haïing ha sem, ki nongshong shnong, ne ki khynnah ban don shajan ka jaka ba trei kiba dei ki par mawshun khnang ba kan nym don kano kano ka jingjia jingmynsaw ïa ki.
Kiba la ai jingkren ki kynthup ruh u Convenor-Dakmia Cement (North East), u K.G.Singh, u Inspection Team Member , Dalmia Cement Bharat Ltd (Meghalaya), u Sukriti Das, u Inspection Team Memebr-Star Cement Ltd, u Bharat Jee Pandey bad kiwei kiwei, baroh kiba la ai jingkren ki la kren halor ki mat ba ïadei bad ki jingshngaiñ ha ki par mawshun ba ki trei, ha kaba ki la ong ruh ba ïa kiba trei ha ki par ki ju ai ha ki ïa ki lad jingiada ba paka ba kin lait na kano kano ka jingma jingmynsaw ban lait na ka jingshitom bad ki la kyntu ruh ïa baroh ki nongtrei ba ki dei ban don ka jingiatreilang ban wanrah ïa ka jingshngaiñ haba trei ïa ka kam.
Kiwei pat ki heh company kiba na Amrit Cement kiba la ïa don lang ha kane ka sngi ki kynthup u Jayant Malhotra, uba dei u Plant Head, u Pramod Kumar Singh, uba dei u Head of Operation, u BK RAUTRAY, uba dei u Head of Department(HOD) Mines bad kiwei kiwei.
Ha kane ka sngi ki nongtrei jong ka company Amrit Cement, ki la shim ruh ïa ki kyntien jingkular lane ka Pledge kaba ïadei bad kane ka prokram 23rd North-Eastern Metalliferous Mine Safety Week 2026 kaba ong “ Ngin bud hok, bud ryntih ia ki jingbthah, ki kyndon jingiada, ngin don ka jingkitkhlieh ïa ka iing ka sem, ïa ka imlang ka sahlang bad ïa ka ri hi baroh kawei da kaba bud ryntih ïa ki kyndon jong ka Safty Rules, ngin ïai long kiba aiti ban iada bad ban noh syniang ha ka roi ka par jong ka ri lyngba ki mar kiba bha kiba ngi sei ne pynmih, to ai ba u blei un ai ha ngi ïa ka bor ba ngin lah ban trei bad bud ïa ki kyndon jingiada”
La pynphuh pynphieng shuh shuh ïa kane ka prokram da ki jingrwai bad jingshad na ki nongtrei jong ka Amrit Cement bad na ki khynnah rit.