Mih ryntih ki paidbah ban pynkhuid ïa ka thaiñ Byrnihat
Hikai ban bud ïa ki kyndon ka SWM Rules 2026
Nongpoh, Risaw 04: Kum shi bynta jong ka Swachhata Hi Seva (SHS) 2026 bad ban rakhe ïa ka Swachh Bharat Diwas/Clean India Day, ka ophis jong u Project Director, SRES-DID, DRDA, Ri-Bhoi District, ha jingïatreilang bad ki Rangbah Shnong bad ki Market Committee jong Byrnihat, Amjok bad Borbhuin, ryngkat bad ki shnong ba marjan, ka la pynlong ïa ka jingpynkhuid ha ki bynta bapher bapher jong ka Byrnihat ha ka 2 tarik Risaw 2026.
Ka jingthmu ba kongsan jong kane ka jingpynkhuid ka long ban kyntiew ïa ka khuid ka suba haka thaiñ Byrnihat kaba la ioh nam ruh kum kawei naki jaka ba jaboh tam.
Kum shi bynta jong ka campaign, la pynsngew ruh ïa ka mat “One Day, One Hour, together – Ek Din, Ek Ghanta, Ek Saath”, kaba pynpaw ïa ka jingdonkam jong ka jingïatreilang bad ka jingkitkhlieh lang jong ki paidbah ban pynneh ïa ka jingkhuid bad ban bret ïaki jaboh haki jaka ba dei ban bret.
Ha kane ka jingpynkhuid, la sakhi ïa ka jingïashim bynta kaba shitrhem jong ki dkhot jong ki Market Committees, ki nongdie dukan, ki nongshong shnong bad kiwei, ryngkat bad ki ophisar jong ka SBM-G, SRES-DID, DRDA, Ri-Bhoi District, bad ki ophisar bad nongtrei jong ka Umling C&RD Block.
Ka jingpynkhuid ka kynthup ïa ka jinglum bad pynkhuid ïa ki jaboh naki jaka iew bad ha ki jaka paidbah bad ha kane ka sngi la pynlong ruh ïa ka jingpynshai sha ki nongdie dukan, ki nongshong shnong bad ki paidbah halor ka jingdonkam ban bud ïa ki kyndon jong ka Solid Waste Management Rules, 2026, ka rukom pynïakhlad ïa ki jaboh katkum ki jait, ka jingbret jaboh ha ki jaka kiba dei bad ka jingkitkhlieh jong uwei pa uwei u briew ban pynneh ïa ka sawdong sawkun kaba khuid ba suba.
Naka liang u Project Director, u R. Brahma, u la pynpaw ïa ka jingsngewnguh sha ki Rangbah Shnong bad ki Market Committee jong ka Byrnihat, Amjok bad Borbhuin, kumjuh ruh sha ki paidbah, ki ophisar bad ki nongtrei kiba la ïashim bynta bad ai jingïatreilang ha kane ka sngi ban wanrah ïa ka Byrnihat bad Ri-Bhoi kaba khuid bad kaba koit ba khiah.