Da ki hajar tuid ki nongwan riewblei sha ka Shrine ka St. Theresa ka Nongda ka Parish Jowai

Jowai, Risaw 04: Ka Ïingmane ka Balang Katholik kaba don ha Jowai, ka dei ka ïingmane kaba la aiti kyntang ha ka ‘riewkhuid Theresa, kawei na ki riewkhuid bakhraw hapoh ka Balang ha ka kam pynphriang Khubor babha jingpynim U Trai Jisu Khrist.
Ha ka juh ka por la ainam ruh ïa ka kum ka Nongda ki Ri Mission ha satlak ka pyrthei ha ka kam Mission jong ki Missionary jong ka Balang. Ka Theresa bakhuid kum ka Nongïasaid ha ka kam Mission ka la theh kyrhai ki jingkyrkhu ha ka kam Mission jong ki Missionary ha kito kiba kyrpad ïa ka jingïasaid bad duwai lem jong ka.
Hynne ka sngi (04/10/2026) da ki hajar ngut ki paidriewngeit jong ka Balang Katholik na ki 18 Parish jong ka Diocese Jowai, ki la ïatuid sha ka Shrine jong ka St. Theresa, kaba long ruh ka ïingmane bah jong ka Diocese, ka Nongda ka Parish Jowai ha ka juh ka por ka Nongda jong ka Diocese Jowai ban pan jingïarap bad jingïasaid na kane ka riewkhuid ha ka kam Mission jong ki bad kiwei de ki jingpan jingïarap ban bha ban miat ka longbriew manbriew.
Ha ka por (10.00 AM) shiphew baje mynstep la don ka jingkñia Mass bakhuid kaba iphuh iphieng (Solenm High Mass) kaba la lamkhmat da u Most. Rev. Ferdinand Dkhar D.D, Bishop ka Jowai Diocese ha ryngkat ka jingïasynran ki Lyngdohsohblei kiba wan na ki Parish jong ka Diocese
U Bishop Ferdinand Dkhar haba kren ha kane ka sngi, u ong kane ka snem ka dei ka snem jong ki paidriewngeit, ka Balang ka kwah ba ki riewngeit jong ka kin long ki riewngeit kiba tip ia U Blei bad iala ki para-briew ban tei ïa ka bha ka miat ka imlang sahlang hala ïing hala sem ha ka shnong ka thaw bad hapoh ka Balang.
Nangta u Bishop Ferdinand u ong kumba ngi kynmaw burom ïa ka St. Theresa ka Missionary bakhraw ha ka kam pynphriang ïa ka Khubor babha jingpynim U Jisu Khrist, to ai ngi baroh ruh ngin long ki Missionary ban pynbna ïa ka Khubor babha lyngba ki kam babha jong ngi pynkut bad kyntu u Bishop Ferdinand ia ki paidriewngeit jong ka Parish Jowai bad kum juh ïa ki paidriewngeit jong ka Jowai Diocese.
Ha shwa ban sdang ïa ka jingkñia Mass bakhuid la ïoh ïa ka jingkren maitphang bad ka History lyngkot jong ka St. Theresa da u Rev, Fr. Eibormitre Lamare bad ka jingkren pdiang sngewbha ïa u Most Rev. Ferdinand Dkhar bad ïa baroh ki paidriewngeit kiba la ïawan riewblei sha ka Shrine jong ka St. Theresa kaba long ka Nongda jong ka Parish Jowai Kba long ruh ka Nongda Nongker jong ka Diocese Jowai da u Rev. Fr. Augustine Lamin uba long ruh u Parish Priest jong ka Parish Jowai.