OKAZAKI, Risaw 02: Ka kynhun siat khnam Recurve ki kynthei jong ka ri India, ba kynthup ïa ka Ankita Bhakat, Kirti Sharma bad ka Kumkum Mohod ki la thaw histori ha ka Asian Games 2026 hynne ka sngi Thohdieng, da kaba pynliem ïa ka Republic of Korea da 5-3 ban khur ïa ka takma ksiar ba nyngkong eh jong ka ri ha kane ka jingïakop.
Kane ka jingjop jong ka India ha Okazaki Chuo Sogo Park Multipurpose Square ka la pynkut ruh ïa ka jingjop ba lynter jong ka South Korea, kaba la bat ïa ka nam lahduh ha ki hynñiew tylli ki sienjam jong ka Asian Games ha ka Women’s Recurve Archery ba la sdang naduh u snem 1998.
Ka kynhun siat khnam jong ka South Korea ka kynthup ïa ka nongjop takma ksiar ha ka Olympic bad ka lahduh jong ka pyrthei ka Kang Chae-young, ryngkat ka Lee Yunji bad ka Oh Yejin.
Kham hashwa, ka Kumkum bad u Dhiraj Bommadevara ki la khur takma rupa ha ka Mixed Team event hadien ba ki la shah rem noh da 5-3 ha ka phainal pyrshah ïa ka Zhu Jingyi bad u Li Mengqi jong ka China.
Ka jingshah rem ka mut ruh ba ka India ka la duh ïa ka kabu ban ïoh ïa ka bhah ban ïashim bynta ha ka Recurve Mixed team ha LA 2028 Olympics.
Kumjuh ruh, ka kynhun siat khnam Recurve jong ki shynrang kaba kynthup ïa u Dhiraj, Neeraj bad Yashdeep Bhoge, ki la hap ban hun ïa ka takma rupa hadien ba ki la shah rem noh da 5-1 ha ka South Korea ha ka phainal hynne ka sngi Thohdieng.
Watla katta ruh, kane kadei ka takma rupa kaba ar sien lynter ïa ka kynhun siat khnam Recurve ki shynrang jong ka ri India ha ka Asian Games hadien ba ki la pyndep ruh ha ka kyrdan ba-ar ha ka sienjam ba long ha Hangzhou 2023.
Ka India kan dang ïakhun shuh na ka bynta ka bhah jong ka ban ïashim bynta ha ka Olympics 2028 ha LA ha kane ka sngi Saitjaiñ, ha kaba ka Kumkum, u Dhiraj bad u Neeraj Chauhan kin ïakhun ïa ka Quarter final jong ka jingïakop siat khnam Recurve ba shimet.
Ki nongjop takma ksiar bad rupa ha baroh ar ki jingïalehkai recurve shimet jong ki shynrang bad kynthei kin pynthikna ïa ka bhah ïa la ki jong ki ri jong ki.
Ka India ka la dep ban ïoh ïa ka bhah ba nyngkong jong ka ha ka ïakop siat khnam lyngba ka Asian Games ha Aichi-Nagoya hadien ba ka Chikitha Taniparthi bad u Sahil Jadhav ki la khur ïa ka takma ksiar ha ka compound mixed team event.
