Ba hap u sainar bor ding 11kv ingkhong ka kali ha NH-6 Pyrtakuna EJHD bad khlad nohuwei uba shong ha kali

Khliehriat nailur 28 : Kawei ka jingjia ba sngewsih bad ba sngewshyrkhei ka la jia ha surok bah national highway ha Pyrtakuna East Jaiñtia Hills District ha kaba u sainar bor ding 11 KV Line u la hap halor kawei ka kali ECCO kaba don u number AS-01 TC 6015 ba na Assa m katba nang ïaid ha surok bad ka kali ka la kem ding kynsan puk, kane ka kali ka dei kaba dang wan na ki thainLad Rymbai ban leit sha Badarpur, Assam.
Katkum ki khobor ba ioh na u Superintendent of Police ka East Jaiñtia Hills District, u Shailendra Bamaniya IPS, la ong ba uwei uba shong lang ha katei ka kali uba la tip kyrteng kum u Riyaj Uddin uba na ka shnong Mamadpur, Madammohan, Karimganj, Assam u la khlad noh ha katei ka jaka na ka daw ka jingkem ding ka met katba uba ñiah ïa ka kali pat u la lait phet bad ym pat shym la tip shano u don mynta bad ym shym la iohi ruh ïa u ha katei ka jaka ba jia.
Ïa ka met jong uba khlad la buh mynta ha ka jaka buh met iap ha Khliehriat Civil Hospital bad ki pulit ki dang wad ki lad ban pyntip sha kiba haïing hasem.
Katkum ki dur khih la iohi ba ki briew kiba lap ïa kane ka jingkem ding ka kali ki la pyrshang ban theh um ïa ka met jong uba khlad khnang ba ka ding kan nym klang, ka kali kaba la kem ding ruh ka la ingkhong lut ploiñ.