Lap ka kynhun na Meghalaya Assembly ïa ka jingtep jong ki lai ngut ki Garo ba khlad ha ka First World War ha Malta

Shillong, Nailur 25: Ka kynhun jong ki nongthaw aiñ bad ki heh sorkar na ka jylla Meghalaya, ba la ïalam da u Lamphang ka ïing dorbar u Thomas A. Sangma, ki la leit ban jngoh ïa ka lum jingtep jong ki shipai Pieta ha Malta bad ki la lap ïa ki jingtep jong ki lai ngut ki shynrang Garo kiba la shakri lang bad ka 69th Garo First War Labour Company ha ka First World War.
Ka kynhun ka la leh burom ïa ki saw ngut ki rangbah na Garo Hills kiba la tep ha u lum jingtep jong ki shipai ba la sumar da ka Commonwealth ha Pieta.Haduh katei ka jingleit jngoh, la sngewthuh ba ka jingtep jong u Khew Marak, uba la khlad noh ha ka 15 tarik Jylliew, 1918, uba dei tang ma u kaba la tip, jong uwei u Garo uba don ha ka 69th Garo Labour Company ha katei ka lum jingtep.
Ha kane ka jingleit jngoh, ka kynhun ka la lap sa ïa ki jingtep jong ki lai ngut kiwei pat ki shynrang Garo – u Ading Marak, uba la khlad noh ha ka 10 tarik u Jylliew, 1918; U Sangjim Sangma, uba la khlad noh ha ka 19 tarik u Jylliew, 1918; bad u Join Marak uba la khlad ruh ha ka 10 tarik u Jylliew, 1918.
Ka jinglap ka ai ka jingïadei kaba kongsan hapdeng ka histori jong ka Meghalaya bad ka khana kaba kham jylliew shaphang ka jingnoh synñiang jong ka India ha ka por jong ka thma bah ba nyngkong.La pynrung ïa ki shynrang na Garo Hills ha ka 69th Garo Labour Company, kaba la kyrshan ïa ki kam jong ki Allied operation da kaba shim ïa ki kam kiba donkam kum ka jingshna surok bad ka jingkit ïa ki mar ki mata.
Haba ai burom ïa kiba la khlad noh, u Lamphang u Thomas A. Sangma u la ong ba kane ka jingleit jngoh ka long kaba donkam bha na ka bynta ka jylla Meghalaya namar ka la wanrah sha ka jingshai ïa ki jaka shongthait jong ki shynrang Garo kiba ka jingnoh synñiang bad ka jingaiti jong ki ka la sahkut khlem da tip bha.
Ha kane ka kynhun ki kynthup ïa u Deputy Speaker u Limison D. Sangma, u Deputy Chief Whip u bah Ronnie V. Lyngdoh, bad u Chairman ka Meghalaya Tourism Development Corporation u Marthon J. Sangma.
La synran lang ruh ïa kane ka kynhun da u Secretary ka Ïing Dorbar Thawaiñ ka Jylla Meghalaya u Malthus S. Sangma bad u Deputy Secretary u Bah Raja Kharpuri.
Ka jingleit jngoh sha Malta ka la long shi bynta jong ka jingleit pule jong ka kynhun hadien ka jingïalang ha ka Commonwealth Parliamentary Association (CPA) Conference ha Cape Town, South Africa.
Ïa kane ka jingleit jngoh ïa ka Pieta Military Cemetery la pynbit pynbiang da ka High Commission of India ha Malta, kaba la pynlah ïa ka kynhun jong ka Meghalaya ban ai burom ïa ki jingtep bad ban buh jingthoh ïa ka jingdon jong ki shipai Garo bad ki nongbylla kiba la shakri shabar ri ha ka por jong ka thma bah ba nyngkong.
Ka jinglap ïa ki lai tylli ki jingtep ka pyni ïa ka por kaba kongsan ha kaba pynneh pynsah bad ithuh ïa ka histori jong ka por thma jong ka Garo Hills bad ka Meghalaya, katba ka pynskhem biang ïa ka jingïadei kaba neh hapdeng ka histori jong ka Jylla bad ki jingjia ha ka pyrthei ha kaba sdang jong ka spah snem kaba 20.