Shillong, Nailur 25: Hadien ka jingud jingnam jong ki paidbah nongshnong jong ka Ri Bhoi District bad khamtam ha ka thaiñ Nongpoh ba hapoh Civil Hospital Nongpoh ym shem la don shuh ki doktor kiba sumar ïa ka jingpang ENT bad ïa ka snieh doh naduh ba ki doktor kila shah pynkynriah kam noh shawei.
Halor kane na ka liang u Bah Mathew Kenneth Makdoh u ba dei ruh u MDC ba shu thung ha KHADC u la leit ban ai da ka jingthoh sha ka ophis jong ka Medical Superintendent hapoh Civil Hospital Nongpoh.
ïa ka jingthoh la leit ban ai ruh sha ka ophis jong u Deputy Commissioner ka District Ri Bhoi hynrei ha kane ka jingleit ai shithi na ka liang u MDC um shym la ïoh ban ïa kynduh ïa ka Medical superintendent namar ba ka dang don hapdeng ka Shuti bad kumjuh ruh u khlem ioh lad ban ïakynduh ïa DC namar ba u dang don ha kiwei pat ki Program.
Hadien ba la wan buh ia kitei ki shithi na ka liang u Bah Mathew u la ong ba hadien ka jingioh ka jingud jingnam jong ki paidbah ha Ri Bhoi District bad khamtam hapoh ka thain Nongpoh ba mynta la bun bnai ba hapoh ka Civil Hospital Nongpoh ym shym la don shuh ki Doctor kiba dei peit ia ka ENT bad ban sumar ia ka snieh doh.
Naka liang jong u MDC u la kyrpad sha ka Medical Superintendent jong ka Civil Hospital Nongpoh bad sha u Deputy commissioner ka District Ri Bhoi ba kin shimkhia ia kane ka kam khnang ba ki paidbah kin nym ïa kynduh jingeh haba ki wan ban shah sumar ha kane ka Hospital.
Ha juh ka por la kyntu ïa u myntri ka sorkar u ba dei peit ia ka tnat ka koit ka khiah ba un shimkhia lang ia kane ka kam naka bynta ban pyndap noh ia ka Post ENT bad ia ka Skin Specialist khnang ba ki paidbah kin ioh ia ka jingsumar kaba paka.
